Ramchhunga Nurse chawimawina sang ber National Florence Nightingale Award chu Pi C.Zopari, Ward Superintendent (Retired) Dinthar, Aizawl-a cheng hnenah hlan a ni.
Nimina he chawimawina hlanna inkhawm, Rashtrapati Bhavan, New Delhi a neih hi President Droupadi Murmu chuan a hmanpui a. India ram state hrang hrang atangin Nurse hnathawk tha leh chawimawi tlak mi eng emaw zahte hnenah chawimawina hi hlan a ni.
Vawiina chawimawina dawngtu Pi C.Zopari hian kum 1985-ah School of Nursing, Civil Hospital Aizawl atangin GNM a zir zo va. 1986 atangin Staff Nurse hna thawk tanin Mizoram hmun hrang hrang – Buarpui PHC, Chhingchhip PHC, District Hospital Siaha leh Civil Hospital Aizawl-ah te post a ni a. Kum 2016 August-ah Ward Superintendent ah promotion a hmu a, District Hospital Kolasib leh Civil Hospital Aizawl-ah kum 37 chhung rinawm taka a thawh hnu in kumin March ni 31-ah Superannuation pension in a chhuak a ni.
Pi C. Zopari hian heng Health Centre hrang hranga thawh chhung hian mi engemaw zat nunna a chhanhim a. Heng nunna a chhanhim sak leh a hnathawh that dangte avangin vawiinah hian India rama nurse chawimawina sang ber National Florence Nightingale Award 2023 hi India President in a hlan ta a ni.
