Vawiin, June ni 3, 2022 hian Congress Party chuan Congress Bhavan Golden Hall-ah Political Session neiin MPCC President, Pu Lalsawta’n thu a sawi. He inkhawm hi Pu LT. Hrangchal, General Secretary, MPCC chuan kaihhruaiin Congress Party ten Tomir Fehchhuah Programme a neih zawh taka fehchhuakten an zin report pein Pu John Siamkunga, General Secretary, MPCC chuan thu a sawi bawk a ni.
MPCC President Pu Lalsawta chuan, kum 2023-ah inthlan kan hmachhawn dawn a. He kan inthlanna turah hian Congress Party te kan sorkar ngei ngei angai a. Zoram mipuite tan Congress Sorkar hi a tul a ni. Congress Party in sorkarna kan chang lova, MNF te an sorkar chhunzawm a nih chuan kan chhuan em em kan ram, kan Zotlang ram nuam, kan lo tih fo hi chenna tlak lohin an chhuah mai ang tih a hlauhawm a. MNF ten sorkarna an chang chhunzawm a nih chuan ‘Mizo ka ni’ tia kan lo inchhuan vena te pawh bovin ‘Mizo ka ni’ tia sawi pawh thil zahthlak tak a ni thei a ni, a ti.
Pu Lalsawta chuan, khawvel ram changkang tak tak te leh ram ropui tak takte, ram hausa em em te nen hian thil neih inang pahnih kan nei a, ram leh mipui hi kan nei kawp a ni. Hemi te pahnih hmang hian America te, German te, Japan te leh ram dang tam takin ram nuam an lo siam tawh. Keini pawhin ram leh mipui hmangin Mizoram hi nuam taka siam kan tum. He thil pahnih hmanga ram nuam siam turin Congress Party hi kan tling tawk a. Mizo mipuite pawh kan ring tawk a ni, a ti.
Finance Minister hlui Pu Lalsawta chuan, sorkar ngawr ngawr hi kan tum a ni lova, sorkar tha siam turin kan inbuatsaih mek zawk a ni. Sorkarna changa hma kan lakna turah kan hausa emaw kan rethei emaw kan ngaihpawimawh hmasak ber tur chu kan environment chhe ta lutuk leh tuihna kam chak lutuk hi a ni a. Kumtinin kan tuihna a kam telh telh a, tun atanga kum 20 lo kal turah hian Aizawl khawpui hian khawi lui tui nge kan rin tawh ang, hetiang lama kan rilru kan sen nasat angai a, development-a kan hmalakna hmasa ber tur chu environment ah a ni. Mihring kan nih chhunga pawimawh ber mai chu kan rilru put dan kalhmang, kan moral hi a ni a, kan rethei kan ni emaw, eng ang pawhin hausa dawn mah ila, kan moral tichhe zawngin mihringte hi kan awm tur a ni lova, sorkar pawhin a tichhe thiang lo a ni, a ti bawk.
