Dt.09.01.2025 (Thursday): Nimin khan East Tuipui bialtu MLA Pu Ramthanmawia chuan Farkawn Water Supply Scheme (Solar Pump) hna thawh mek chu a hmun ah a enpui. Pu Ramthanmawia hian tui pump na hmun tur Tiau lui thlenga luh chilh in chipchiar takin hna thawh dan hi a enpui a ni.
NABARD RIDF XXVIII hnuai atang thawh Farkawn Water Supply Scheme ( Solar Pump) hi Crores 15 man zet niin Tiau tui pump tur a ni. Tui pump hna hi Exelsoirs Merchants ten an thawk mek a. Stage 5 a pump tur niin nitin Tui litres 4 lakh a pump thei dawn a ni. Tun ah hian 85 percent thawh zawh tawh niin kumin March thla ah zawh tura ruahman a ni. A enkawl hna hi Champhai WATSAT Circle hnuai ah Champhai WATSAN Division leh Khawbung WATSAN Sub-Division ten an enkawl a ni.
Pu Ramthanmawia chuan “Ramngaw chereu zel ah harsatna kan tawh langsar tak chu kan tui lak hnar kang chho zel hi a ni a. Tun hmaa Gravity a tui lak kan kham khawp viau thin kha tunah chuan tui haw tur a awm mumal ta lo va. Ka bial khaw hrang hrang te pawhin tui ah harsatna kan tawk nasa em em a. Kan bial chhung hmun dang te chu JJM in cover in tui hniang hnar pek mek leh thawh mek te an ni a. Farkawn bik hi JJM hmanga tui lak te an kham khawp loh avangin tui an harsa em em a. JJM hmangin Cover theih a ni tawh si lo va. Fund dang remchang zawngin theih tawp kan chhuah a. Sorkar hmasa hunlai khan Sorkar duhsakna changin NABARD RIDF XXVIII tangin fund kan hmu thei ta hlauh mai a, Kan lawm tak zet a ni. He Scheme hi thawh zawh a nih hunah chuan Farkawn khua in tui hnianghnar tak an hmu thei tawh dawn a ni,” a ti.
Pu Ramthanmawia chuan he Water Scheme a hlawhtlin theih nana theih tawp chhuahtu PHE Official te chungah lawmthu sawiin, “An ni theih tawp chhuahna zarah tun hun hi kan thleng a ni. He Scheme hlawhtlin theih nan hian an thawkrim em em a. An tha leh zung leh ngaihtuahna tam tak an seng a ni. An chungah hian lawmthu kan sawi a ni,” a ti a. Contractor Excelsoir Merchants ten hna tha taka an thawh vanga leh Farkawn khawtlang mipuite support na avangin lawmthu a sawi bawk.
East Tuipui bialtu MLA hi a nupui Pi Lalchawithangi leh Er Thanchungnunga SE Champhai WATSAN Circle hoin PHE Official ten an tawiawm a. MNF Gen Hrqs hruaitute bakah Farkawn khawtlang hruaitute leh Party hruaituten an tawiawm bawk a ni.
East Tuipui Bialtu MLA Pu Ramthanmawia hian Nizan khan Farkawn Community Hall ah Farkawn Students Union Silver Jubilee lawmna khuallian niin a hmanpui bawk.
