Dated Aizawl, the 4th February, 2025 : Model Code Of Conduct bawhchhia ti a MNF General Headquarters-in State Election Commission, Mizoram hnena Pu Lalnghinglova Hmar, Minister of State hekna (vide letter No.MNF/2025-3, dated : Aizawl the 30th Jan.2025) chungchang SEC-in an ngaihtuah hnuah vawiin (Thawhlehni) khan thuchhuah (order) an siam a, Pu Lalnghinglova Hmar-in MCC bawhchhiatna a nei lo an ti.
State Election Commission, Mizoram chuan MNF General Headquarters-in an hekna leh Pu Lalnghinglova Hmar, MoS insawifiahna ngun taka an ngaihtuah hnuah thutlukna siamin Election Model Code of Conduct Para – VIII (2) leh (14) bawhchhiatna a nei lo an ti a, Minister hian Party mite hmaah sawrkar hmalakna awm tawh sa leh hmalakna kal mek chungchang a hrilhfiah mai a ni. MCC-in a sawi hmasawnna lam hawia bul tanna lung phum leh policy thar puan te, thawh zawh tawh hawnna emaw chutiang lam kaihhnawih hawnna inkhawm leh ruahmanna thar lam hawi reng reng puan chhuah loh tur tih hian a huam lo a ni tiin thuchhuah an siam.
Lalnghinglova Hmar, Minister of State hian a bial Aizawl West-II huam chhunga ZPM Local Council Candidate-te inhmuhkhawmna, 27th January, 2025, Vaivakawn YMA Conference Centre-a a thusawi chuan Model Code Of Conduct a kalh loh thu tunkar thawhtanni Party chhung inkhawmah a lo sawi tawh a. ZPM Local Council Candidate-te inhmuh khawmnaah hian Mizoram Sorkarin Aizawl West –II bial tana a hmalak tawhna te sawiin a bial chu sawrkarin an duat hle a, kum khat chhung lekin cheng nuai 4500 chuanga thuam turin pawisa an dah tawh a ti. Pu Lalnghinglova Hmar chuan, SASCI Part-III hnuaia Aizawl West Outlet Project, Motor kawng siamna tur Rs.20 crore Mizoram Sorkarin a ruahman fel tawh a, kawngpui siam zawh a nih hnuah chuan Tuikual leh Dinthar veng mawng ber berte chu kawngpui lian kama cheng an ni tawh ang. December 6, 2024 khan sorkar laipuiin SASCI hnuaiah Rs.300 crore min pe a, chumi zingah chuan Aizawl tlak lam veng zawng zawngin an chhawr tangkai tur Vaivakawn Bazar sakna atan cheng vaibelchhe 25.35 (Nuai 2,535) dah a nih thu a sawi bawk a ni.
