ZPM Thalai Headquarters-in thuchhuah siamin, “9th Mizoram Legislative Assembly 4th Session (Budget Session, 2025) neih mekah ni 10 March, 2025-a Star question 87, Pu Ngunlianchunga zawhna, zawhbelhnaah Pu Lalmuanpuia Punte zawhna ‘Pu V. Zirsanga’n eng case te nge a neih?’ tih House Leader leh Chief Minister ni bawkin a chhannaah Pu V. Zirsanga ACB case neih pakhatah Pu Ngunlianchunga chu ‘main accused’ a nih thu a sawi chhuak a. House Leader Pu Lalduhoma’n zawhna a chhannaah, a phuahchawp ni lo, thu dik, engmah belh awm lo, MNF Sorkar hunlaia atanga Case kal mek, Pu Lalduhoma kaihhruai kutthlakna awm lovah Pu Ngunlianchunga’n a ngai haw ta hle mai hi ZPM Thalai Hqrs. chuan mak a ti a. Assembly House-a mahni insawithiam tuma hun a hmang ta vak mai kha MLA senior tih atan chuan a mawilo hlein ZPM Thalai Hqrs. chuan a hria a ni. Pu Ngunlianchunga hian a thiamthu sawi a duh chuan Court-ah thahnemngai takin a sawi zawk turah kan ngai a ni. Pu Ngunlianchunga hian ACB Case neih hi a hre lo tak tak a nih chuan, Pu Lalduhoma, House Leader-in a ACB Case neih a hrilh hria leh Anticipatory Bail dil tura a rawnna kha Pu Ngunlianchunga hian duhsaknaa ngaiin a lawm hle zawk turah ZPM Thalai Hqrs. chuan kan ngai a ni.
“Pu Lalduhoma’n Mizoram Legislative Assembly Session neih mekah MNF sorkar hunlaia Pu Ngunlianchunga ACB Case neih a sawichhuah chungchangah Mizoram Congress Party mi leh sate’n duhlohna lantirna vawiin (12.03.2025)-ah Mizoram Assembly Session neihlai tibuai zawnga awmkhawm phallohna hmuna an inhawrkhawm chiam mai hi ZPM Thalai Hqrs. chuan Dan zahlohna lian takah a ngai a, pawi a ti takzet a, Mizoram Congress Party-in ACB Case nei MLA thlavang hauhva hum kan tum zel a nih chuan ram siamthat chu a har hlein kan ring a ni. Mizoram Congress mi leh sate’n Pu Ngunlianchunga thlavang an hauh duh tak tak a nih chuan Court-a ngaihtuah a nih hunah theih tawpa tan la turin kan duhsak a. Kan Congress Party unaute Politics kalphung hlui hmanga Party mite hawrkhawma buaina siam tura an inngaihna bansan a, fim taka kan ram siamtha tura Politics khel turin kan sawm tak zet a ni,” an ti bawk.
