November 1, 2023 (Nilaini) hian Pi Sonia Gandhi, CWC member AICC chuan Mizoram inthlanpui lo awm turah Congress Party-in hnehna a chan ngei theihnan duhsakna hlanin, a thusawi (Message) Video Clip chu Prof. PJ Kurian, Dy. Chairman Rajya Sabha (2012-2018) & Union Minister (1991-1996) chuan a tlangzarh a ni.
He huna thusawitu Prof. PJ Kurian chuan BJP hlauhawmzia sawiin ‘One Nation, One Culture,’ ‘One Nation, One Religion,’ One Nation, One Language,’ kalpui an tum nasa hle a. He’ng hi hnam tlem zawk leh a bik takin Kristian tan chuan a pawi em em a. Congress Party chuan kan do tlat dawn a. Mizoram mai ni lo India ram pumah Sakhaw Zalenna a awm theihna atan theihtawp kan chhuah zel dawn a ni, a ti.
Prof. PJ Kurian chuan Sakhaw Zalenna chauh hi Congress Party ngaih pawimawh a ni mai lo a. Kan nunphung (Social Life) kan ngai pawimawh hle a. BJP in Parliament-a MP zawng zawng hnena an sem India Constitution Preamble a Secular leh Socialist an paih hi Mizo Kristian tan a pawi em em a. Hemi avang ringawt pawh hian Mizoram leh India ramah Congress Party a sorkar a ngai a. Chutiang tur chuan Mizoram mipui te’n Congress Party Vote theuh turin ka sawm che u a ni, a ti bawk.
Pi Sonia Gandhi chuan mizo mipuite duhsakna a hlan a. June 30, 1986 a Mizoram kan rawn tlawh a mizo mipuite min lo lawm danah lawmthu ka sawi thar leh a. Tin, kuminah ka fapa Rahul Gandhi rawn kal in lo lawm danah Mizo mipuite hnenah lawmthu ka sawi takzet a ni, a ti a. Mizoramah BJP thawhpui ve ngai lo tur Congress Party lo VOTE vek turin mipui ka sawm che u a. India ramah Sakhaw Zalenna a awm leh ngei theihna atan BJP leh a thawhpui te hi Mizoramah leh India ramah kan Vote loh ngam an ngai a. Mizo mipui Kristian tha tak te tan Congress Party a ding reng dawn a ni, a ti bawk.
