Private school-a Hindi kalpui theih laia sorkarin a kalpui thei lo mak ti

Mizo Hindi Zirlai Pawl (MHZP) Gen. Hqrs. chuan, “Private Sikulte’n Primary atanga Hindi zirna an kalpui theih laiin, sorkar berin a enkawl Govt. Primary Sikulah Hindi zirna a kalpui thei lo hi chu pawi an tiin hriatthiam har an tih thu an sawi.
MHZP chuan an pawlin hmalakna hrang hrang a neihte an bawhzui reng tih sawiin, “Ni 09-06-2022 khan Education Minister Pu Lalchhandama Ralte hmuh a ni a. Kan sorkar leh a ngaihna hria Education Minister Lalchhandama Ralte hmalakna azarah tunah hian CSS hnuaiah H/S leh M/S Hindi teacher 806 lai lak thar an nileh ta hi lawmawm kan tiin, fakawm kan ti takzet a ni,” an ti a. He hunah hian Primary Sikul atanga Hindi zirna hi kalpui a nihleh ngei theih nan leh Hindi Teacher post pawh create leh ngei a nih theih nan chak taka hma lak a tul thu Education Minister hnenah hian ziakin an thlen nghal a. Hindi zirtirtu hi P/S-ah dah a nihleh theih nan central-ah hma lak mek a nih thu leh Relaxation chungchangah pawh a theih ang anga enzui zel a nih thu Minister chuan a sawi a, sorkar hmalaknate a hlawhtlin ngei pawh an beisei tlat tih an sawi bawk.
“Union Home Minister Pu Amit Shah-a’n hmarchhakah pawl 10 thlengin Hindi zir a nih tur thu leh, ‘Compulsory’ a nih tur thu a sawi hi, keini MHZP chuan ‘Hindi’ zirna chawisanna leh tih hmasawnna a nih rualin, ram leh hnam inpumkhatna tha siamtu tur a nih dawn avangte, kan ram leh hnamin a mamawh leh a tuihalna a nih tawh avangin kan thlawp tlat a ni,” an ti.
MHZP chuan, “Sorkarin tling leh tlaka a ngaihte chungah rinna nghat chungin CSS Hindi teacher atana a lakte zingah mahni post-a awm tha duh lo, aikal la lui an awm tih hriat a ni a. Mahni hnaah pawh tui lo leh thawk thaleh duh lo an awm fo a nih chuan a theih ang angin Sorkar kan thawhpui zel dawn a. Sorkarin a lak chhan ang ngeia sikul naupangte hnenah rinawm taka zirtirna pe ngei turin CSS Hindi teacher zawng zawngte kan ngen tak meuh a ni. CSS Hindi teacher ban takte lakleh vek an nih tur thu 2018 MLA General Election dawna MNF Party auhla kha, tuna kan sorkar MNF Ministry hian engtinnge a tih dawn tih hi kan thlir reng a ni,” an ti bawk.