Kumin July 18 hian India President 16-na tur thlan a ni dawn a. Mizoramah pawh vote thei chinten vote an thlakna buaipui tur officer ruat an ni.
2022 June 9 khan Election Commission of India chief election commissioner Rajiv Kumar chuan President of India thlan hun tur hi puangin inthlan chungchang hriattirna hi June 15 khan tihchhuah a ni. President inthlana chuh tumte tan June 29 thleng hun hawn a ni anga, June 30-ah hming thehluhte hi endik a ni anga, July 21 ah vote tla chhiar a ni ang.
Tuna President ni lai Ram Nath Kovind hi July 24-ah a term a tawp dawn a ni.
President thlan hi secret ballot-a neih tur a ni a; Lok Sabha, Rajya Sabha leh State Legislative Assembly member-te bakah Union Territory atangin Delhi leh Puducherry Legislative Assembly member te chu thlang thei zingah an tel a ni.
President of India thlan, Mizorama kalpui turin ECI chuan assistant returning officer leh presiding officer-ah Mizoram State Legislative Assembly commissioner & secretary H Lalrinawma a ruat a, assistant returning officer atan Mizoram State Legislative Assembly additional secretary Lalhmahruaia Zote ruat a ni.