February ni 27, 2025 (Ningani) khan Pu K.Vanlalvena Rajya Sabha MP chuan Chinland Council sawrkar thuthmun Camp Victoria, Chin Statea awm chu a tlawh a. Ni 28, 2025 (Zirtawpni) khan Zokhawthar ral leh lama awm Khawmawi- a tlawh bawk a. Hualngo ram sorkar (HPO) hruaitute nen inkawmhona an nei bawk.
Camp Victoria a tlawhnaah hian Chinland Council- sawrkar hruaitu te leh Chinland sipai ten ramri atanga lo hmuakin Sipai ten salute lo pein parthite an lo awrh tir a ni. He hmunah hian Pu K.Vanlalvena hi Pu Pathanga, Chinland Chief Minister leh Chinland Minister-te leh sawrkar mipawimawh dangte bakah CNF Army hotute nen inkawmna hun tha tak neiin Camp Victoria thuthmun *Chinlung City* hmun pawimawhte an fang ho bawk a ni. Tlai lamah hlim taka ruai theh ho a ni.
Hualngo ram government (HPO) a tlawhnaah hian Pu Lallawmzuala, Vice President HPO-ten lo dawng sawngin sipai hruaitute leh council hotuten an lo tawiawm bawk a, an Hospital-te leh sikul hmun hmate an lo fan kualpui bawk.
Heng hmunahte hian Pu K.Vanlalvena chuan Myanmar, India ,Bangladesh-a Zofate hi hnam hming hrang leh tawng hrang hrang nei mai ila; hnam khat kan ni a. Pathianin chanchintha hril tura a thlan hnam kan nih avangin kan la ding chhuak ngei ngei dawn a ni a ti. Kan awmna hmun leh kan tawngte hrang rih mahse, inpumkhatna hi kan vawng reng tur a ni a ti bawk. Unau karah inhriatthiam lohna engpawh awm se; silaia inkah hmanga sawifel lovin inbiakna hmanga sutkian thin tur a ni tih thu a sawi bawk.
Sakhaw lian pui pui Buddish, Islam, Hindu sakhaw betuten min hual vel avangin Pathian rinchhanin kan kal tur a ni a. Kan ralthuam neih that ah te kan hnam himna hi a awm loh thu sawiin, Pathian kan rinna hi kan ralthuam tha ber a nih thu a sawi bawk.
Pu K.Vanlalvena chuan, “Chin leh Mizo hi unau kan nih avangin ramri hung pawh Tiau-ah ni lovin, Chindwin lui kamah hung rawh se tih hi kan duh dan a ni. Myanmar nena kan ramri chu Tiau a ni lo a, Chindwin a ni a, thlang lamah pawh Bangladesh phaizawl thlengin a ni,” a ti.
Ram leh hnam chhan nan mi tam takin nunna in chan tawh a, tunah thalai rual tam tak in pen chhuak mekte hi kan ngaihlu che u a. Mahse, silaite hi chu a tul tawpkhawkah lo chuan hman hauh loh tur a ni tia fuihin, administration khawihtute leh sipaite hi lungrual taka kal zel turin a fuih bawk a ni.
MP Rajya Sahba hi MNF General Headquarters atangin hruaitu engemaw zatin an tawiawm a. Chin State-a mipawimawh Aizawla awm thenkhat ten an tawiawm bawk a ni.
