Sawrkar officer thenkhat, mahni thuneihna hmangsual leh politician-te tlawn a, remchang zawng rana hna thawk thinte chu an chhuichiang anga, a tul angin central hotute hnen thlengin an thlen dawn tih National Stundents’ Union of India Mizoram State chuan an sawi.
NSUI Mizoram State thuchhuak chuan, sawrkar laipui ruahman – Rashtriya Uchchatar Shiksha Abhiyan (RUSA) hnuaia college-te tih hmasawnna tur hna hrang hrang atana sum lokal tam tak, contractor-te hnena peklawk vek tawh, la thawh zawh loh tam tak a awm tih a hriat thu a sawi a. College thuamthat hna thawh dan an endik tawh thenkhatah hnathawh tha tak tak a awm laiin, hna muang leh thawh chakloh leh thawh mumal loh tam tak a awm tih an hmuh thu a sawi. ‘Kan ram siamthatna tur sumpai tam tak hnathawh muan vang leh thawhchhiat vanga kan chan fo hi pawi kan ti a. Ram hmasawnna atana sum lokal leh hnathawhte endikin uluk takin kan vil dawn a, contractor-ten a hun taka hna thawk zo tur leh revise estimate beisei lo turin kan ngen a ni,’ a ti.
Sawrkar official zingah ram hmangaih leh thahnemngai tak officer thangthar an chhuak zel chu lawmawm a tih thu NSUI Mizoram hian a sawi a. Chutihrualin officer thenkhat, mahni thuneihna hmangsual leh politician-te tlawn a, remchang zawng rana hna thawk thin an awm tih sawiin, ‘Hetiang mi te hi kan chhuichiang dawn a, a tul chuan an service chungchang thlengin central hotute hnenah kan thlen dawn a. Chuvangin kan ram siamthatnan theihtawp chhuah a, hna thawk tlang turin mipui leh sawrkar hnathawkte kan ngen a ni,’ a ti.
Write to Te-a MD Khawlhring
