Vawiin dar 12:30 hian MPYCC chu New Secrretariat gate bulah inhawrkhawmin Dt. 11/7/2022-a stroke avanga thi ta ; Pi Lalhriatpuii (L), Millennium Centre-a Grape Wine zuartu thlavang hauhna hun flag dum nen an hmang. New Secretariat gate-ah hian sorkar chuan Police thahnem tawk tak an lo awmtir bawk. Dawta Pi Lalhriatpuii (L) puhtu Excise and Narcotics changtu Minister Dr. K. Beichhuaa chu bang ngei turin an phut thu an sawi. Congress Thalai hian Excise Minister Dr. K. Beichhuaa emaw, a Private Minister tal lo chhuaka an thutlukna hriat phutin an nghak a, tlai dar 3:35-ah a PS lo chhuakin gate kiangah an inhmu a, Minister dawhkana inbiak an duh thu an sawi a, mahse Congress Thalai hian thu phut an neih a hriat vek tawh avangin amah Minister ngei lo chhuak turin an phuta darkar chanve an lo nghah leh tur thu an sawi.
Congress Thalai President Dr. Lalmalsawma Nghaka chuan intawhkhawmnaah hian thu sawiin, buaina siam tuma kal an nih loh thu a sawi, “Vawiinah buaina siam tuma lo kal kan ni lo, he thihna rapthlak tak tuartu lainat lo vawiinah in awm kan ring lo a ni. Pi Lalhriatpuii zahawmna humhim tura lo kal kan ni, zangnadawmna cheng 100 kan phut sak a, kan hre tlang vek. Millennium Centre-a thil thleng kan hre vek, dan lova zu zuara puhtu Excise Minister Dr. K. Beichhuaa hian ngaihdam a dil kan phut. Pa tha tak chu a ni, amaherawhchu a thinlung tisaktu a nei aniang,” a ti a.
“Pi Lalhriatpuii (L) hi Grape Wine nuai 22 chuang man an man sak a, a rilru a hah em em a, stroke te a nei ta hiala a boral ta a ni a. He thihnaah hian zangnadawmna vawiin chhun dar 12 hma ngeia pe turin kan phut tih Excise Minister Dr. K. Beichhuaa hnenah Dt. 12/7/2022 khan lehkha pein kan phut a. Hei dar 12 thleng kan nghah hnuah zangnadawmna an pek tur thu emaw, an pek thu emaw pawh kan dawng ta lo a, keini Congress Thalai chuan zangnadawmna an pek loh chuan hma kan la zel dawn a ni,” a ti a.
“Zangnadawmna hi ngatinge nuai 100 in tih min tih chuanin, mihring nunna hi pawisa nena tehkhin rual a ni lo a, nuai 100 hi zangnadawmnan Pi Lalhriatpuii (L) chhungte kan dilpui a ni mai,” Dr. Lalmalsawma chuan a ti.
MPYCC President chuan, “He thihna hi politicise kan tum a ni lo, amaherawhchu sorkarin dik lo takin a ti a, an tu leh fate khawtlang pawhin zahawm taka an en leh theih nan kan ti a ni,” tiin Pi Lalhriatpuii (L) te chhungkua dik lo taka puhna awmte chu sorkarin ngaihdam dilna mai bakah, zangnadawmna a pe tur a ni an tih thu a sawi.
Grape Wine kha Excise Force a mantute kan dem a ni lo, a thupetu dawta puhtu kan dem a ni tiin, kan chawl mai dawn lo, kan ramin dikna a mamawh, kan ramin dikna a chan tawh loh zia kan hria. Minister hi rawn hmuh kan tum lo, rawn phutpui kan nei a, chu chu kan rawn ngaichang mai a ni. ‘Moral Responsibilty’ tal pawhin a bang tur a ni. Lal hi kan ‘addict’ te em a, kan hotute a lu ber mumang umin mi pawi kan sawi mawlh mawlh a ni. Zangnadawmna an pek loh chuan kan che reng ang, vawiin hi kan aitechhinna mai a ni. MNF leh ZPM lam pawhin sorkar thiltih dan a dik lo tih kan hriat angin he hmalakna hi min thlawp turin kan sawm a che u, MPYCC President chuan a sawi.
Dr. K. Beichhuaa hian Congress Thalai kawm a duh thute a lo sawi a ni awm a, inkawm a ngaihnachhan kan hre lo a, kan thil phut a tih hlawhtlin loh avangin hmalak chhunzawm zel a ni ang, tiin Congress Thalai President chuan a sawi.
Intawhkhawmna programme chairman Laltawnliana, Vice President MPYCC chuan, “Zu zuar lo zu zuarah he sorkar hian a puh a, a tu leh fate lo awm leh zel tur pawh a ti zak a ni, hei hi pawi kan ti a, ngaihdam dil rawh se kan ti,” a ti bawk.
