Vawiin dt. 30/09/2022 hian BJP Mizoram Pradesh chuan BJP State Office, Atal Bhawan, Upper Republic ah Political Session neiin, Dr. Zonuntluanga, Central Scheme Monitoring & Vigilance Cell GS in inkhawm kaihruaiin, Vanlalhmuaka State President chuan BJP zawm thar mi panga (5) lawmluhna leh thusawina hun a nei a ni.
Vanlalhmuaka chuan, “tun hnai lawkah Lunglei Municipal Council Election lo awm tur atan Campaign Kick-off kan nei a, heta kan hmuh chian tak chu Mizoram kawng chu a chhe hle a ni tih hi a ni. Kawngpui ṭha kan duh tak tak a nih chuan Mizoram mipuite hian BJP kan sorkar tir a ngai a, kawngpui chhe lutuk en hian kan ram hruaitute hian kan ram leh hnam an hmangaih tak tak lo a ni tih a lang chiang hle a ni. Mizoram khawpui ber Aizawl leh a dawttu Lunglei panna kawng te hi a chhe hle a, kawngpui ṭha kan mamawh takzet a ni, kawngpui chhia tamna ram apiangah development a thleng tak tak theilo a, kawngpui ṭha min pe theitu chu BJP bak hi an awmlo a ni tih hi Mizoram mipuite hian kan hriat a hun tawh hle a ni,” a ti.
Vanlalhmuaka chuan, “Kum 2023 ah chuan Mizoram mipui zarah a lo berah sorkarna ah kan tel tawh dawn a, chumi hnuah chuan Zoram mipuite hian hmasawnna hmel kan hmu chho ṭan thei tawh dawn a ni. Zirna in ṭha, Damdawiin ṭha, kawngpui ṭha kan nei tawh dawn a, kuthnathawktute leh miretheite ngaihpawimawh an ni anga, an dinhmun dawmkan an ni anga, kan ramin hmasawnna tura a mawmawh apiangte kan neih theih nan kan thawk dawn a ni a ti.
Vanlalhmuaka chuan dawt sawi hrat tak takte chuan an dawt sawi hi an awih leh mai ṭhin ang hian kan ram hruaitute pawh hi chutiang ang chuan an awm mek a, an dawt sawi hmang hian Mizoram min tuam hlawm mek a ni, Tunhnaia CM-in Delhi zin chuan tunhmaa enkawl thei a tih Airport leh ZMC te chu Central hnenah an enkawl tura pek a duh thu a thlen a, hei hian MNF Sorkar hi an beidawn zia a tilang tih a hriat a ni. Chuvangin sorkar lai MNF hi an sorkar leh a nih chuan, Union Territory-ah min dah mai rawh u an tih hial a rinawm tawh a ni a ti. Tuna SEDP an sem tur Cheng 300,000/- pawh hi, 25,000/- term khat chhunga (kum 5 ) an sem hman chauh chuan cheng 300,000/- an sem kim hun kan nghah palh hlauh chuan tuna ṭhalaite hi an tar hman tawh dawn a ni,” a ti bawk.
Vanlalhmuaka chuan, “NE States-a NDA lemchang awm chhun chu MNF hi an ni a, hei hi a pawi hle a, mahni nihna anga langchhuak ngamlo te hi ram hruaitu atan an ṭha ngai lo a ni. Tun hunah pawh kan ram harsatna ah hian a mawhphurtu chu Sorkar lai hi an ni a, Central khuan lemchang leh lemchang lo hi chu an hre ve khawp tih hi kan hriat angai a ni. Ram hruaitu ten Dawt hmanga ram min hruai chuan Mipui ten kan tuar thin a ni. Zoram mipuite hi enkawl nuam ber kan ni hial in a rinawm a, nimahsela hruaitu ṭhalo chuan mipui an hruai ṭha thei lova, mipuiin harsatna an tawk mai ṭhin a ni,” a ti bawk.
