“Naktuk July ni 18, 2023-a, Prime Minister Narendra Modia’n National Democratic Alliance (NDA) Meeting Delhi-a a koh-ah hian, Chief Minister Pu Zoramthanga chu tel ngei ngei turin MPYCC chuan kan phut,” tiin Congress Thalai chuan thuchhuah a siam.
Thuchhuahah chuan, “MPYCC chuan MNF party hi NDA meeting-ah hian tel ngei turin kan phut a. Manipur a kan unau Zofaten harsatna rapthlak tak an tawh lai leh awmze nei taka Kristian te Biak In 250 chuang suasam a, halchhiat a nih tawh hnuah pawh BJP kaihhruai Central a NDA sorkar atanga an thlavang hauhna engmah ala awm lo te hi MNF President Pu Zoramthanga hian na taka a dem kan phut a.
“Mordekaia’n Juda ho humhim nana Estheri hnena ‘tun hun hi a ni dawn lawm ni?’ a tih ang khan, NDA meeting hi Pu Zoramthanga hian Manipura Zofate leh Kristian te thlavang hauhna atan remchangah hmang ngei rawh se tih hi MPYCC duhdan a ni.
“MPYCC chuan Chief Minister Pu Zoramthanga chu Prime Minister hnenah hian Manipur a remna leh muanna a awm theih nan, a rang thei ang ber a hma la tur leh huaisan tak a nawr turin kan phut bawk a.
“Sakhaw zalenna chungchangah pawh Manipur a Zofate tawrh naah hian a phen-ah RSS te hmalak na a awm ngei a hriat a nih avangin, hemi chungchang pawh hi huai taka sawi turin MPYCC chuan Chief Minister hi kan phut bawk a ni,” tiin an tarlang bawk.
