Vawiin khan PC Party chuan thuchhuah siamin,”ZPM sawrkarin fur ruahpui tlak tam hma thla 5 chhung teh meuh Aizawl Khawpui chhûng kawngpui chhia siamthatna hun te, Kawnpui leh Khamrang inkar Kawngpui chhia siamthatna hun te an neih reng lai a, an ngaihthah avang leh an vei tawk loh avanga mipuite’n harsatna namen lo kan tawh hnua – ruah sur tam vang leh Sawrkar hmasa te sulhnu pawr vang – tia chhuanlama an hmang hi thu belhchian dawl lo, mipuite bum tumna leh tham lohna lian takah PC Party chuan kan ngai,” an ti.
Thuchhuahah chuan, “Hetih lai hian tunhnaiah Lirtheia Eizawng Inzawmkhawm Pawl (Mizoram Commercial Vehicle Union) ten nitin chakkhai lakluhna Kawnpui leh Khamrang inkar kawngpui chhia karkhat chhûnga siamtha turte, Motor engemaw zat tang hnukchhuak tur te a Chief Minister Pu Lalduhoma an nawrna te tihhlawhtlin sak ngei a tum thu CM-in alo tiam leh hnuhnawh hian ZPM sawrkar chu nawrchawp ngai, nawrchawp chauha chet lak tum sawrkar a nihzia a tilang chiang hleah PC Party chuan kan ngai bawk a ni.
“Karkhat chhunga Kawnpui leh Khamrang inkar Kawngpui chhia siamtha tur leh Motor tang te, a thlawna hnuhchhuah sak CM-in a intiamna te hi a rang thei ang bera tihlawhtling turin PC Party chuan CM kan ngenin, kan lo thlir reng dawn a ni,” an ti bawk.