Aizawl August 29 : Hand Foot and Mouth Disease ram thenkhatah a len mek chungchangah State Nodal Officer Of The Integrated Disease Surveillance Program (ISDP), Dr Pachuau Lalmalsawma chuan, tun hnaia India chhim lam state- a Hand Foot and Mouth Disease ( HFMD) natna leng mek chu Odhisha state a naupang kum 9 hnuai lam zinga mi 26 ah pawh hmuhchhuah tawh a nih thu a sawi.
Dr. Pachuau Lalmalsawma chuan August ni 23 thleng khan Kerala, TN, Haryana leh Odisha state piah lamah chuan Tomato Flu hi hmuh a la ni rih lo a ti a. Hand, Foot and Mouth Disease (HFMD) – Tomato Flu hi naupang kum 10 hnuai lamin an kai deuh ber a, puitlingah pawh a awm thei tho a nih avangin fimkhur a tul thu a sawi.
Dr. Pachuau Lalmalsawma chuan Tomato Flu hi virus chi khat vanga awm, a lan chhuah dan pawh taksa hmun hrang hranga Tomato pianhmang ang deuhva durh insiam a ni. Durh sen te reuh te te chu lo thang lianin tomato pianhmang a lo ang hle thin a ni. Tomato Flu hi Virus natna dang ang bawkin- Khawsik Luak chhuak leh Luak, kawthalo Tui tlakchhamna Ruh chuktuah vung, Taksa na them thum bakah Hritlang ang tein a lang chhuak thin thu a sawi.
State nodal officer chuan Tomato Flu natna vei naupang bul hnaia thil – naupang awmna toy, thawmhnaw leh thil dang khawih te, thil ei tur chik lo leh tifai hmasa lova hmawm nghal maite hian a kai theih a ni a ti a, Enkawlna hranpa a awm lova, damlo dah hran, hahchawlh, tui ril lam chi in tam leh a tul dan a zira na chhawkna eite a ni ber a ti a, a in venna lam sawi telin Mi dang bula awm tam loh, He natna vei ni theite kuah emaw, an bungrua leh thawmhnawte khawih loh a him ber thu a sawi bawk.