Vawiin hian Lunglei Municipal Council Ward number 1 huam chhung Zotlang leh Venghnuaiah street campaign neih a ni a. He hun hi Lalruatkima Adviser, Prof F Lalnunmawia MLA & Adviser, Dr ZR Thiamsanga MLA & Adviser leh Dr Vanlalṭanpuia MLA & Adviser ten an hmanpui a. Pu Lalruatkima chuan Zotlang MNF unit I leh II aṭangin party hrang hrang aṭangin voter 62 a lawmlut a, Venghnuai aṭangin voter 50 a lawmlut bawk a ni.
Heng hmunah hian Lalruatkima chuan thusawiin, “Nau chu a paitu ngeiin a hring ang a, a hringtu ngeiin a enkawl zui dawn a ni. Chu chu thil kalphung tur a ni,” a ti a.”Lunglei mipui zawng zawngte MNF candidate chhinchhiahna arsi-ah lo vote vek turin thinlung takin kan ngen che u a ni,” a ti bawk.
Lalruatkima chuan, “He MNF sorkar chak tak hian kawng hrang hrangin hmasawnna a thlen nasa hle a. Health care changchangah te, kawngpui siam ṭhat chungchangah te leh kawng hrang hrangah kum 5 kal ta kha thlirlet ila. Hripuiin kum 2 min tibuai chungin hma kan sawn nasa hle. Gas a hnianghnar ta hle a, buhfai ṭha thlan ngai lovin a ṭha ta vek mai a. He sorkar hnuaiah hian nitin ei bar mamawh hnianghnar takin min pe zel a ni,” a ti.
MNF Adviser chuan, “Ramri humhalh chungchangah MNF chu a tlanchhe ngai lo a, huaisen takin ke a pen ngam a ni. Thisen hial a chhuak a nih kha. Hripui a lo leng a, kan phek buai a. Phaia eizawng leh zirlai an lo haw hum hum a. Mizo tlawmngaihna a lo lang a, ‘ṭhenawmten an nghei ang’ tih hlauin kan indawmkang tlang a. Kum 2 chhung kum chhia kan tawk a, ramri buai, ram kang, hripui, vawk pul hri leh lirnghing kan tawk a ni. Pathian hruainain chhuanchham kan awm lo. He sorkar hun chhia min petu Pathian hian kum ṭhat kum min pe ang tih hi ka ring tlat a ni,” a ti bawk.
Lalruatkima chuan party dang chungchang sawiin, “Congress party hi an phur lo em em mai a, ṭhat loh theih lohna bawm an zuar a. An bawm zawrhah hian an mahni intifai hmasa phawt rawh se, mipuiin an ti a ni. Central lamah an khawnvartui a kang tawh a, tih tlak an awm tawh lo. Tun LMC-ah pawh hian beisei tur an awm tawh lo a ni,” a ti a. “ZPM hi social media-ah an sorkar a. Anni hi hmana kan hriat ṭhinte kha an ni a, an kawrhak an thlak mai a ni. Election apiangin symbol an thlak a, a mumal loh thlak hle. Pawl thar siam te, pawl hming thlak te an uar em em mai a. Tun LMC inthlanah pawh an symbol an thlak lrh tak hi. Zoram Exodus Movement, ZNP leh MPC te an inchhungkhawm a. Pawl hrang hrang kalkhawm tih takah an inngeih lo hle a. An chhungril innghirnghona hi a puahdarh hun a awm ngei ang,” a ti bawk.
He hunah hian LMC Ward I Candidate Lalhmingmawia leh Ward II Candidate Laldingngheti Pautu te pawhin thu an sawi a ni.
