Mizo Zirlai Pawl (MZP) General Headquarters chuan tun hnaia Commerce & Industries Department (Commerce Wing) hnuaia Assistant Marketing Inspector post khat (1) lak tur, Exam pawh conduct vek tawh hnua, interview tura koh ten interview-na hmun tur an thlen vek tawh hnua hna lak an cancel thut hi mak a tiin, hriatthiam har a ti hle a. Thalai hna zawng mekte zah lohna lian takah a ngai a ni.
Commerce & Industries Department (Commerce Wing) hnuaia Assistant Marketing Inspector post khat (1) lak tur hi, ni 6 October, 2023 khan advertisement tihchhuah a ni a. Written Exam hi ni 19 July, 2024 khan neih a ni. Written Exam beitu atangin mi 10-te chu ni 10 September, 2024 zing dar 10-khan Commerce & Industries Secretary Room-ah Personal interview tura koh niin, interview tura kal ten an mahni koh hun an nghah mek laiin, hna lak hi cancel an nih thu leh application fee an lak let theih thu hrilh an ni a. Thalai hna zawng mekte ti hnual thei zawng leh ti beidawng thei tur thil hetiang a thleng ta mai hi MZP chuan a ngai thutak hle a. Thil thlen dan uluk taka chhui chiang a, a tisualtu lakah hremna lek ngei turin MZP chuan sawrkar a ngen a ni.
MZP chuan thalai hna zawng mekte inbuatsaihna ti thlawn tur leh rilru na taka siamtu hi hrem ngei a phut a. Department pawh hetiang thil lian tak an tihsual avangin ngaihdam dila, sawifiah turin MZP chuan a phut bawk. Tun hnuah hetiang thil dik lo a awm a nih chuan, MZP inrawlh ngai lova, rang taka chingfel turin MZP chuan sawrkar a ngen bawk.
MZP chuan tun hnaia Mizoram sawrkar hnuaia hna hrang hrang lakah, dik leh felfai taka hnalak kalpui turin Sawrkar department hrang hrangte a ngen nawn leh a. Sawi neuh neuh awmte pawh a tul angin chhuizui a tum bawk. Mizoram sawrkar pawh hetiang thil dik lo ti thinte enzui tur leh, thalai hna zawng mekte ti beidawngtu na taka hrem turin a ngen nawn a. Puanzar a, na taka nawr innawr hmaa Zirlaite leh Thalaite hmakhua ngai hram turin a ngen bawk a ni.