Mizo Zirlai Pawl (MZP) General Headquarters, Aizawl Executive Committee meeting vawi 627-na chu vawiin chhun dar 12 khan MZP Conference Hall-ah an thukhawm a, meeting hi MZP President Pu H Lalthianghlima’n a kaihruai a ni.
Meeting-ah hian Zirtirtu aikal la leh mahni post a awm lo te chungchang, Free Movement Regime (FMR), Myanmar sipai India rama lo tlan lut chungchang leh pawl chhung thil pawimawh hrang hrangte a ngaihtuah a ni.
Meeting chuan, Zirtirtu aikal la leh mahni post a awm lo te chungchang a ngaihtuah a, Mizoram sawrkar-in zirtirtu aikal lak titawp tura a hmalakna chu tha tiin a thlawp tlat a, Education Minister Dr. Vanlalthlana pawh chak taka hma la turin a ngen nghal a ni. MZP chuan February 10 ral hma ngeia aikal la leh mahni post-a awm lote chu MZP General Headquarters-ah report turin a hnuaia Headquarters, Sub Headquarters leh Branch te a hriattir a, February thla ral hma ngeia chingfel turin hmalak a tum a ni.
India leh Burma ramria zalen taka inkalpawh theihna, Free Movement Regime (FMR) thiah tumna awm chungchang pawh ngaihtuah niin, Mizo hnam inpumkhatna leh inunauna tichhe thei tur a nih avangin a tawp thlengin dodal zel nise tih a ni.
Meeting chuan, Bangladesh atanga an sa himna zawnga kan unau rawn raltlante Central force ten an lo dan fo laiin, Myanmar-a kan unaute tibuaitu ber Myanmar (State Administration Council) sipaite zalen takin an ralthuamte nen awlsam takin ramri an rawn kan fo chu tha lo a ti hle a. Civil mi tanpuina mamawha lo lutte laka an khawng em em laia, buaina siamtu ber Burma sipaite a ngaihsak em em leh duat taka an thawn kir fo chuan mit a ti kham hle a ni. Mizoram-ah Myanmar SAC sipaite hi lo lut tawh lo turin meeting chuan a duh a ni.
