MZP chuan, “Zofate hi kan duh reng vang ni lovin, International boundary pathum; India, Myanmar leh Bangladesh-ah thendarh kan ni a. India ram chhungah pawh state hrang hrangah kan inthen darh bawk. Heng Zofate min thendarhtu ramri hi, Zofate rawnna leh remtihna awm hauh lova British-in a siam a ni a, Zofate tan chuan engti kawng maha pawm chi a ni lo,” an ti.
Vawiina thuchhuah an siamah MZP chuan, “Zofate hian heng ramrite hi kan rilru tak takin kan pawm ngai lova. Mizoram NGO hrang hrang leh Political Party tinte pawhin kan pawl thiltum-ah ‘Zofate rorelna pakhat hnuaia awm’ tih hi kan ziak lang hlawm a. Chutih laiin tun hnaiah India sawrkar-in Chin State leh Mizoram State zalen taka kan inkalpawhna Free Movement Regime (FMR) tih tawp leh ramri hung (Border fencing) an tum hi pawi kan ti hle a, dodal zel kan tum a ni.
“United Nations Declaration on the Rights of Indigenous Peoples (UNDRIP) 2007 Article 36 na chuan, ‘Tualchhuak hnamte, a bik takin khawvel sawrkar ramri khamin a thendarhte chu an inkalpawhin an inlaichinna tinghet tur leh in tanpui tawn a tul pawhin an intanpui tawn ang a, sakhaw thil leh khawtlang thil, ei leh bar leh politics-ah te an mahni mi leh sate nen inpawha inpawlho theihna dikna chanvo an nei. Ram roreltute chuan tualchhuak hnamte nena inbe rawnin hetiang dikna chanvote hi tipuitling turin hma a la ang.’ tiin chiang takin a inziak a. Chutih laiin, Zofate zalen taka kan inkalpawhna ramri hung leh F.M.R tihtawp hian unau, ramriin a thendarh mek Zofate, min thendarh dawn avangin keini tan pawm theih a ni lo a ni.
“MZP chuan, danin a phal loh ruihhlo leh khap thilte chu ramri hung kher lo hian a tihrem dan dang ngaihtuah zawk turin central sawrkar a ngen a ni.
“MZP chuan hemi chungchangah hian Mizoram Chief Minister Pu Lalduhoma leh Home Minister Pu Sapdanga chu theih tawpa hmala turin a lo ngen tawh a. India Prime Minister Pu Narendra Modi hnenah Memorandum thehluh tawh niin, Union Home Minister Pu Amit Shah bakah, India Vice President leh Union Home Secretary-te a copy pek an ni bawk. Chutih laiin, Ceneral sawrkar atangin thulh tumna emaw engmah thu lawmawm dawn a ni lova, ramri hung tur hian ngawrh takin inbuatsaihna a kal mek niin hriat a ni.
“Chuvangin MZP chuan Border Fencing leh Free Movement Regime (FMR) tihtawp tumna duh loh lantir nan, vawiin hian India Prime Minister Pu Narendra Modi leh Union Home Minister Pu Amit Shah te lim a hal a ni,” an ti bawk.
