USA-a zin mek Central YMA leh Central YLA hruaitute chuan Myanmar atanga Mizorama raltlante chungchanga an hmalakna leh tanpuina awm theite Bureau of Population, Refugees & Migration (PRM), US State Department, Washington DC- ah an sawipui.
Meeting-ah hian Central YMA hruaitu, R. Lalngheta, President leh Prof. Malsawmliana, Assistant Secretary te bakah HC Vanlalruatpuia, President, Central Young Lai Association (YLA) te an tel a. Zo Tum Hmung, Executive Director, Chin Association of Maryland (CAM) leh Matthew Wilch, Advisor to CAM ten an tawiawm.
CYMA hruaitute hi US State Department-a Bureau of Population, Refugees & Migration (PRM)-a Asian Team Leader, Hoa Tran-in a hova, member dang – Jack Dart, Burma Unit Chief, Julien Kreuze, PRM Program Officer, Meredith Houck, PRM Program Officer, Brandon Sabado, PRM Program Analyst leh Rajani Ghosh, India Political-External Unit te an tel bawk.
Central YMA leh CYLA hruaitute chuan Chin unau raltlante an lo buaipui dan leh Mizo mipuite lo dawnsawn dan te an sawi a. Chenna tur camp te, ei leh in, thawmhnaw leh eirawngbawlna bungbel an ngaihtuahsak dan te leh Mizo mipuiten YMA kaltlanga tanpuina sum an pek dan zawng zawngte an hrilhfiah a. Mizoram sawrkarin theihtawp chhuaha a buaipui dante an sawi tel bawk.
Central YMA leh YLA hruaitute chuan US sawrkar chu aiawh intira raltlante dinhmun a hmun ngeia hmuhpui ve tur leh tanpuina awm thei ang angte pe ve turin an ngen bawk.
PRM Asian Team Leader, Hoa Tran chuan YMA leh YLA hruaitute hnenah Myanmar atanga raltlante an buaipuina zawng zawng chu ropui a tih thu a sawi a, lawmthu a sawi nghe nghe a ni. YMA hruaitute ngenna, raltlante an awmna hmun ngeia tlawh chu tha an tih thu a sawi a, aiawh intirh an tum thu a sawi. Raltlante tanpuina chungchangah a remchan anga pek dan kawng zawn an tum thu a lo hrilh bawk.
