Mizo Students’ Union (MSU): General Headquarters, Aizawl chuan vawiin ni 17 December, 2024 hian kumin 2024 atana Office kharna programme chu MSU Pisa Pui, Tuikual South-ah a hmang a. He hun hi Pu Roluahpuia, Vice President chuan kaihruaiin, Pu Samuel Lalruatdika General Secretary chuan pawl hma lakna report a pe a ni.
MSU President Pu B. Lalkhawngaihzuala chuan thusawina hun neiin, “MSU chu zirlai pawl a nih angin Mizo zirlaite chanvo humhim turin theihtawpin ke a pen dawn a ni,” a ti a. Thiamna leh finna chauh hmachhuan a, ram leh hnam hmakhua ngai lotute’n eirukna hmangin kan ram an tihchhiat mek thu a sawi a, Mizo zirlaite chu ram leh hnam hmangaihna thinlung nei chunga zirna kalpui turin a chah a ni. MSU President chuan zirtirtu transfer and posting chungchang MSU chuan a chhui dawn tih sawiin politics thil avanga zirtirtute sawn an ni ṭhin chu zirlaiten an tuar nasa hle tih a sawi a. Tin, Sawrkar High school, a bikin HSLC Exam Centre ṭhenkhata Headmaster awm mumal lo chu MSU chuan ṭha a tih loh thu te, Samagra zirtirtute’n hlawh an hmuh ṭhat loh chungchangah te, Sawrkar Department hrang hrang hnuaia dik taka hna lak a nih theihna tur chungchangahte leh Mizoram hmun hrang hranga kawng chhia avanga zirlaite’n harsatna an tawh chungchangah MSU chuan hma a lak dawn thu a sawi a ni.
He hunah hian MSU Sr. Adviser Pu Lalhmachhuana Zofa aṭangin kum thar thuchah leh fuihna thu ngaihthlak a ni a. Pu Lalhmangaihzuala, Finance Secretary aṭangtin finance report ngaihthlak a ni a. Pu Lalrampanmawia, Treasurer chuan lawm thu sawina neiin hun tawp a khar a ni.
MSU Pisa Pui hi Mizo mipuite dawr theih turin nakkum ni 17 January, 2025-ah hawn a ni leh dawn a ni.
