Ration buhfai semchhuah tûr sorkar kudam (Go-Down), Zuangtuiah a awm lo tih thu hmun hrang hrang atanga an dawn vang leh mipuiten hunpui laia Ration buhfaiah harsatna tawh an hlauh thu an dawn vangin vawiin khan MPYCC chuan an tlawh.
- Congress Thalai chuan ni 20.12.2024 (Zirtawpni) hian Sorkar Buhfai Kudam (Go-Down), Zuangtui an tlawh a. Mizoram chhung hmun hrang hrangah Retailer-te’n December thla Ration Buhfai a ṭhena sem a, a ṭhena semloh a la nih chhan leh Kudam-a Buhfai semchhuah Retailer-te lak tur a awm loh chungchangah Kristian te hunpui Krismas laia harsatna mipuiin an tawh lohna turin finfiah a ni a. Mizoram mipui te hlauthawnglo turin an chah.
He hunah hian Pu Laltawnliana MPYCC President chuan buhfai chhek khawlna hmun endik chu sorkar tihmualpho tum vang ni lovin mipuiten kan hnena an manganna an rawn thlen vanga Kudam hi tlawh a ni tih sawiin, Retailer tinah Buhfai pek chhuah kim a nih thu thawkten min lo hrilh vangin mipuite thlaphang lo turin a chah a, Opposition nimah ila sorkar hi mipui siam a nih angin mipui tâna an thawh that chuan kan lawm a, kan thlawp a ni tih sawi a. Sorkar hi an diknaah chuan puih leh thlawp kan inhuam reng a, mahse mipui ten an chanvo tur a hun taka an chan loh a, mipui tawrhna a thleng dawn a nih chuan huai takin mipui tan ke kan pen zel dawn. Mizoram mipuite pawhin harsatna an neih te inthlahrung loa, min rawn bengvar puia min hrilh zel turin kan ngen a ni. Retailer tam takin Buhfai sem tur an neih har deuh avang leh a hun taka mipuiin an dawnglo pawh hi sorkar lam pawhin Opposition beng thlen kher hmaa hma la zel tur leh an inzawrh ang ngeia mipui tana tun aia nasa leh sorkar kal tawhte aia thil ti theia mipuia inzuar an ni tih inhre thar leh zual turin ka ngen a ni, a ti.
Pu Tawna chuan, Ration Buhfai man 100% a ZPM sorkarin a tih to tâk avangin chhungkaw tam an buai a, Kohhran hrang hrangah Kohhran mipuiin a Buhfaitham buhfaia pek aiin pawisaa thawh an pung nasa hle a. Mi mangang leh tanpui ngai tanpuina hmun Home tam takah buhfai ei tur harsatna an tawk nia lang hi sorkar in enlet thuai se kan duh tih sawiin, Ration Buhfai hi Retailer te hnenah DCSO thuchhuahin Allotment Order hmanga Challan an tihfel hnuah Delivery Order (DO) hmangin Kudam (Go-Down) a la ṭhin an ni a. Order a ruala an hmuh vek laia Buhfai semchhuah tur sorkar Kudam-a a awm lo titih fo hi sorkar inthlahdah vang a ni, a ti bawk.
Pu Laltawnliana, President MPYCC chuan December ni 20, 2024 thleng hian thingtlangah leh Aizawl khawchhung hmun thenkhatah Ration buhfai an la lak loh thu kan hre bawk a. Kristian-te hunpui kan hman dawn laia kan mamawh ber Buhfai khamkhawp kan hmu lo mai dawn emaw tih tur khawpa mipui kan thlabar hman mai hi a pawi hle a. Kalphung thar sorkar hian, Mizoram kalphung a tih danglam nasat lutuk avangin mi harsa zawkte tawrhna nasa takin a thleng mek zel a ni, a ti bawk.
He hunah hian MPYCC atangin Ngurdingpuia, Sr. Vice President, H.P.Lalchuailoa General Secretary, R.Lalhmingmawia General Secretary, David Lalhmachhuana General Secretary leh Secretary leh Joint Secretary thenkhat te an kal a ni.
