Vawiin khan MPYCC chuan Mizoram Governor, Chief Minister leh Manipur Chief Minister te hnenah Nov. ni 7, 2024 zana Meitei ten Zaiawn khua an beihnaa rawng taka an thah Zirsangkimi Hmar chunga thil thleng an duhloh lantirna lehkha an thehlut a. Mizoram Governor hi a zin lai a nih avangin a private Secretary hnenah an hlan a ni.
Lehkha thehluh zawh hian MPYCC President Pu Laltawnliana Sailo chuan thusawiin, “Pu Lalmuanpuia Adviser to Chief Minister chuan August ni 3.2024 (Inrinni) khan Lamka-ah thuthar thehdarhtute a kawm a. Chief Minister Pu Lalduhoma leh Union Home Minister Amit Shah te inbiakna chanchin alo hriat thu leh, Manipur Chief Minister N. Biren Singh-a’n Manipur buaina chingfel tura palai hna thawk tura Pu Lalduhoma a sawm thu pawh a lo hriat thute Pu Lalduhoma a biak nghal thu a sawi niin ka lo hria a, kan lawmin kan thla a muang hle.
“Mahse, August Zonet chanchinthara an puan kan lo hriat leh danin Manipur Chief minister hian remna palai atan Mizoram Chief Minister ruat a ni loh thu leh thu dik lo a nih thu Manipur assembly house ah a sawi bakah, tun hnaiah Manipur Chief Minister hian na tak tak leh tawngkam mawi lo tak takin Mizoram Chief Minister a cho thu national media lamah hmuh tur a tam hle.
“Hei hian Mizoram mipui nasa takin ati chiai takzet a, heti taka khawvel pum hmuha Mizoram mipuiin an thlan kan Chief Ministera chona hi Congress thalai chuan a ngaizam mai mai dawn lo a, na taka Manipur Chief Minister hi dolet turin Mizoram sorkar leh mipui ka sawm a ni.
“Kan home Minister zahawm tak Pu K. Sapdanga’n November ni 2.2023 (Thawhlehni)-a ZPM VWorking President a nih laia Aizawl Press Club-ah thuthar thehdarhtute a kawm tum a, ‘BJP Meitei ho sapatal vanga kan unaute tawrhna chu Mizoramah ZPM sorkar a din hnu pawha NEDA hoin kan unaute an la sawisa chhunzawm zel a nih chuan, ralkhat atanga kut kuangkuaha thlir ngawt kan tlin ve pek lo ang. A hen tawk tala kan unaute thlavang kan hauh ve pawhin, min dem bik lo turah kan ngai,’ tih a sawi pawh kha Mizoram mipui leh Manipura kan unaute hian a tak takin hmuh an duh tawh a ni,” a ti bawk.
