Vawiin ni 24.4.2025 Ningani hian Dr. Lalmalsawma Nghaka, Treasurer MPCC chuan Dampa East Block khaw thenkhat Ailawng, W. Lungdar, Khawrihnim, Lungphun leh Reiek khuate a tlawh a, party hruaitute nen inkawmho na hun tha tak an hmang.
Dr. Mala chuan MNF chungchang sawiin, “MNF hun chhung zawng khan bumin kan awm a, an hotupain mumang ramah min hruai a, SEDP min tiam a engmah min pe leh si lo, chuvangin MNF te hi chu mipui tan rin an har tawh a ni. ZPM sawrkar pawh hian hun reilote chhungin mipui beisei an pha lo tih a lang nghal a. Thlai thar lei chungchangah an intiam angin an kal lo. Kawng hrang hrangah mipui beisei an phak lohzia kan hmu chho zel a ni. Healthcare Scheme ah lah Private Hospital te tan a pawm theih lohvin rate an siamsak a, chuvangin Private Hospital ten an thawhpui duh lo. Tuna ZPM sawrkar Universal Healthcare hi mipui beisei a ni lo,” a ti bawk.
“Hei mai a ni lo kan sawrkar hrawn mek hian sumkhawn tam ringawt a ngaihtuah emaw ni chu aw a tih theih, chhiah hrang hrang a tisang a, buhfai man nen lam mirethei zawkte nghawng turin a tisang a. Chumai ni lo, dan lova rawn tawlh luh smuggling thil kuva rah an man sa te pawh an sum duh lutuk vangin an lilam duh a nia. Nakinah chuan an ruihhlo man sa te, an zu man sa te hi an sum duh lutuk vangin an la hralh leh duh mai ang tih pawh hlauhawm tak a ni. ZPM Sawrkar hi inthlan hmaa an intiam angin an awm loh zia a lang chho mek a, kuthnathawktuharsa ve te te leh, mi nawlpui tan beidawnna a thleng mek.
“ZPM Sawrkar hian an deuhsawh em em thin Congress Sawrkar kha mahni intiamnaa din nghehah a ne pawh an ek lo tih Mizoram Mipuiten an hmu fiah chho mek. Mipuiten ZPM Sawrkar an deuhsawh let hun a thleng chho mek. Chuvang chuan mipuite lung a leng leh tan mek a ni.
“ZPM zia a mak deuh mai chu anmahni khalh ngil tura thahnemngai taka beitute an vau nasa a, case siamsak an ching a, chu chu BJP Modi a mize dik tak a ni a. Mahse, chuti mai mai a vau zam chi kan ni lo. ZPM hian ruling power hian mipui an vau zam zo tawh lova, thudik a lal zel ang a, an mualpho zel ang.
“Congress in kan ti ang kan tih chu Pathian zarah kan ti mai thin. ZPM Research based ang mai mai in thil kan ti ve ngai lo. Kan thil tih tur kan duan lawkte hi a theih zia kan zirchian vek hnuah keini chuan kan ti ang kan ti thin a ni. Sawhthing leh thlai dang lei chungchangah hian ZPM Sawrkar hi an “Intiamnaah ding rawh se” kan ti mai a ni.
“Vawiin ni ah hi chuan MNF Sawrkar kalta leh, ZPM Sawrkar kan hrawn mek ah hian danglamna a awm lo tih mipuiin an hmu fiah chho viau tawh. Heng anih avang hian Congress Party hian kan ram mipuite rawngbawl sak leh turin nasa takin hma kan la chho mek a.Kan hna hmasa ber tur chu Mizoram sum leh pai dinhmun siamthat leh a, miharsa zawk leh kuthnathawktute, kan hmeichhiate leh thalai rual dinhmun chawi kan hi a ni. chumi atan chuan kan Policy tur pawh kan hrual mum chho mek a ni.
“Ram hruaina hi Pathian tihna tak tak nena kan tih a pawimawh hle a, vawiin ni a kan ram politics a Pathian leh a thu te hmaikawra hman kan chin hi sim hmak a tul. Pathian tihna tak tak nena hma kan lak chhoh a ngai. Chuta tan chuan mahni indah tha a, midangte rawngbawltu kan nih ngam te pawh a pawimawh hle. Chuvangin, Congress hruaitu; headquarters atanga unit level thlengin Pathian tihna tak tak nen a hma la turin kan infuih a, huaisen tak leh dik takin hawh kan penchhuah a tul a ni,” a ti bawk.
He hunah hian Dr. Mala hi MPCC hruaitute Pu Lalthankhuma(Ltka), Pu Chullova Ralte, Pu Siby Lalsangbera Hnamte, Pu R. Lalhlunchhunga (Vala), Tv. Jerry Vanlalhlimpuia, MPYCC atangin Pu Ngurdingpuia Pachuau, Pu R. Lalhmingmawia, Pu Laltlankima Ralte ten an tawiawm ani.
