Champhai North Block tlawha hun hmang mek Pu Lalnunmawia, Sr. Vice President, MPCC chuan nimin lamah khaw hrang hrang a fan hnuin vawiin March ni 18, 2025 hian Hnahlan khua tlawhin Champhai North Block II khaw hrang hrang aṭangin Congress Party zawm thar mi 44 a lawmlut.
MPCC Sr. Vice President Pu Lalnunmawia Chuaungo chuan, India ramin zalenna a neih tirh khan ram hruaitu Congress Party chuan Sakhaw tinte zalen taka kan awm theih nan theihtawp chhuahin Constitution ah pawh ziaka dah a nih thu sawiin keini Kristiante chu kan Lal Isua tana thawktu tur kan ni a. Chumi kan beihna kawngah kan Missionary ten harsatna tawka Jail-a in khungna a thleng ta hi a pawi hle a. Central-a BJP sorkar hnuaiah Kristiante nekchepna hi a zual tulh tulh a ni. India rama Hindu lal ram din tumtu BJP te hi kan paihthlak a ngai a ni, a ti.
MPCC Sr. Vice President chuan, Kristian nekchepna chungchang sawiin kan ṭhenawm lawk Assam State ah chuan ṭawngṭai dam rawngbawlna hi sualah min puan sak a. Chutiang ti lui an awm a nih chuan lung in a khung theih an ni. Kan ramah zalen takin Biak In chhungah rawng kan bawl a, kan Missionary; Lalpa tana sengkhawm hna thawktute hian eng ang harsatna nge an tawh tih hi ngun taka kan ngaihtuah a ngai a. Congress Party chuan kan ram, kan hnam, kan sakhua a him zel theih nan hma kan la dawn a ni, a ti.
Pu Nunmawia Chuaungo chuan, Mizoram Politics ah tuna Sorkarna chang mek ZPM te chuan Sorkar kal tawh zawng zawngte chu engmah hnathawh nei lo anga chhuahin chhe lai let derah an chhuah a. Vawiin ni a kan rama hmasawnna lian tham zawng zawng hi Congress Party hnathawh a ni. MNF ten sum tam tak dawng chungin Tuirial Hydel Project an ti hlamzuih a. Congress Party in thar thawh lehin Hydel Project puitling kan nei ta a. Nimahsela, MNF te thil tih avang khan êng chhit man a sang a. Hei hi a tuartu chu mipuite kan ni. MNF ten an siam puitlin duh loh ZMC pawh harsatna tam tak paltlangin Medical College ah Congress Sorkar chuan a siam a. Lengpui Airport nise, sawiselna tam tak karah Congress chuan a siam puitling a. Nimahsela, ZPM ten zirchianna awm tak tak lovin IAF hnena hlan an tum tlat a. Vanneih thlak takin Union Home Minister Amit Shah chuan AAI hnena hlan tura a tih avangin IAF hnenah an hlan ngam lo chauh a ni, a ti.
Mizoram Chief Secretary lo ni tawh Pu Lalnunmawia Chuaungo chuan, NLUP ṭha zawk leh changtlung zawkin kan dinthar leh dawn tih sawiin NLUP hmasaah khan Party inthliarna awm lovin chhungkaw nuai khat leh singli chuang NLUP pek an ni. Vawiin niah erawh Sawhthing ching rawh u, min ti a. Collection Centre-a sawhthing hralh a nih dawnin ZPM ah in inpek phawt a ngai an ti a. Hei hi em ni Kalphung thar chu? Kut hnathawktute thlai thar lei nan pawisa an dah thei lovang min ti a. Ni 3 chhungin Vaibelchhe 110 kan dah tiin chhuang takin a sawi a nih kha. Nimahsela, financial year khat chhungin kut hnathawktute thlai thar lei nan cheng khat pawh an hmang lo. An mahni in relbawl nan chiah sum leh pai hi an hmang a ni, a ti bawk.
Pu Lalnunmawia Chuaungo, Sr. Vice President hi MPCC Spokesperson Dr. Lallianchhunga, Pu Lalhmingmawia, General Secretary, MPCC, Pi Lalnilawmi, Secretary, MPCC, Pu Lianhleia, Vice Chairman, Communication Dept., MPCC, Pi Zoremnghaki, Media Dept., MPCC leh Pu Larry Lalrinawma, General Secretary, ADCC ten an ṭawiawm a ni
