MPCC president-in MADC chungchanga PAC thutlukna a puang

Vawiin July 15, 2022 hian Congress Bhavan, Aizawlah Friday Political Session neih a ni a. Political session hi Vanlalruata, Secretary, MPCC-in a kaihruai a, report hrang hrang ngaihthlak a nih bakah Lalsawta, President-in MADC chungchanga PAC thutlukna a puang a ni.

Lalsawta chuan MADC chungchanga PAC thutlukna puangin, “July 12, 2022-a PAC meeting chuan Displinary Action Committee-in a zirchianna leh tul ang ang a rawn theh luh chu kan sawiho a. Mara Autonomous District Council-a Congress MDC 4-ten Congress led government siama MNF an thawhpui hi PAC-in a remtih loh a nih avangin PAC hi hemi chungchanga kan dinna hi a la ngai reng a ni,” a ti.

Lalsawta chuan, “Duh se chu MNF leh BJP hian MDC 21 neiin sorkarna an siam thei reng a. Amaherawhchu, 2023 General Election thlir ranin an thawk ho duh lo a, Mara mipui dinhmun ngaihtuah miah lovin sorkarna an siam duh lo a ni. Keini pawhin nakum inthlan thlirin BJP hi thawhpui chiah kan ngai lo hrim hrim a. Tin, MNF pawh hi tuna an hnuhma leh an sorkar that loh em avang hian thawhpui chiah kan ngai hek lo. Kan thawhpui chuan MLA Election campaign hunah sawi tur kan neih pawh kan ring lo. Nimin lawk thlenga kan beih reng han thawhpui leh si kha a tha lo kan ti a ni. Chuvang chuan thawhpui loh nise tih hi PAC hian vawi 3 a rel a, a vawi 4-na atan kan dinna hi kan puang nawn leh a ni,” a ti.

Political Session-ah hian KS. Thanga, Ex Minister pawhin thu sawiin, “Congress sorkar liam ta kha sorkar tha tak a ni a, term hmasa kum 5 phei kha chu opposition-te pawhin sawisel ngaihna an hre lo a, Mizoram a sorkar awm tawh zawng zawnga sorkar tha ber a ni. MLA seat pawh seat 32 atangin 34 kan la leh ta a nih kha. Term 2 naah kan lo inthlahdah ta deuh a, zu zawrh phalnate kan pe a, heti takin Kohhran rilru kan ti na ang tih pawh kan hre lo. Mahse, chu chuan nasa takin Politics boruak inlumlet a siam ta a, chiang takin kan tla ta a nih kha. Tunah hian zu kan zuar tawh dawn lo tiin Kohhran lakah ngaihdam kan dil a, kan ngaihdam dilna hi min pawmsak turin Kohhran hote pawh ka ngen a ni. Tin, Pu Lal Thanhawla a chawl tawh a, lo kir a tum tawh lo. A tawngkam hmansual palh avanga thinlung nate khan a chhe lam min hriatsak tawh lo ula, Mizoram tana a thil tih te, remna siamtu a nihnate hi min hriatsak tawh zawk rawh u,” a ti.

Sum leh pai enkawlna kawnga Congress leh MNF inthlauh zia sawiin, “Congress sorkar lai chuan sorkar hnathawk, a duh apiang hnenah GP Fund kan pe thin a, kum khatah Vbch. 500 atanga 600 hi GP Fund-ah kan release thin. Pension chhuak turte, an chhuah hma kum khatah an duh chuan an pawisa lak tur 90% a dil theih vek. Tunah chuan GP Fund lak a har em em a, pension a chhuakten kum hnih hnuah pawh pawisa an la thei lo. Heta tang ringawt pawh hian MNF nen khaikhin chi kan ni lo tih a chiang hle a ni. Congress sorkar lai khan kum 3-na atangin NLUP cheng nuai 1 kan sem tan a. NLUP atan hian Central sorkarin Vbch. 2871 min pe a, hei hian leiba a siam belh miah lo a, hmasawnna hna a tibuai miah lo bawk. Agriculture lamah nise Congress sorkar khan Agriculture link road Km 2500 chuang kan lai hman a, 75% subsidy-in power tiller 2500 chuang kan pe a, 95% subsidy-in tractor 200 chuang kan sem bawk. Kan chhiatna lai chauh thlir tum sa hrim hrim tan lo chuan Congress sorkar kha sorkar chhia a ni reng reng lo,” a ti.

Friday Political session-ah hian Pu Vanlalhruaia (Mapuia), Dinthar Veng, Aizawl chu Congress Party-ah lawmluh a ni bawk.