Vawiin ni 22.4.2025 (Thawhlehni) hian Mamit district chhunga khaw hrang hrang tlawha zin MPCC President Pu Lal Thanzara chuan, Bawngva, Darlak, Tuidam, Kawrthah, Zamuang, Zawlnuam, Bungthuam, Luimawi, Thinghlun leh Kanhmun khuaa Congress party mite a tlawh a, inkawmna hun hmangin Pu Lal Thanzara chuan Mizoram leh Assam ram in rina Thinghlun rama 4th IR battalion camp a tlawh nghal bawk.
Pu Lal Thanzara chuan, “Thil paruk LALPAN a huat thin a awm a, pasarih a tenzâwng tak a awm; chung zingah chuan Mit chapo te leh lei daw thei te, Pawi khawih lo thisen chhuahna kut te, Thil tha lo suangtuah thin thunlung te, Pawi khawih tûra ngalchak te; Hretu der dawt sawi thin te, Unau kara inrem lohna tuhtute hi. Pathian huatzawng Bible in a sawi te hi tuna Mizoram dinhmun a ni mek a ni.
“Ruihhlo a hluar em em a. Kan Minister te pawh Assam rifle hovin an zim luih luih a, Mizoram chhungkaw tam tak buaina thlentu Ruihhlo tawlhtute leh a zuartute nena ram hruaitu chu in hnaivai takin an khawsa mek hmuh hian Mizoram mipui thinlung a ti naa, Kohhran nun a nghawng mek a ni.
“Kuthnathawktute tana inzuar khan Kuhva chingtute harsatna thlentu Kuhva tawlh ruk chu sum siam nan chhuanlam siamin an zuar a, sorkar hi Smuggler lian tia koh theih turin Contraband, Smuggling Goods a man khawm sa a hralh duh hian a lantir a. Kuthnathawktute leh NGO te rilru thuk takin a hliam a ni. Hetiang a nih avang hian Mizoram hian he sorkar hnuaiah hian chunglam malsawmna beisei ngam chi a ni lo”, a ti.
Pu Lal Thanzara chuan, “Politics kal sual avangin khawvel hmun tam takah ram a buai. Kan chhehvelah Bangladesh, Manipur, Myanmar lama kan unaute pawhin nasa takin an tuar. Mizoramah pawh Politics kal sual vangin kum 20 chhung ram a buai a. Mi tam takin nunna an chan a, piansual phah te, tun thlenga rilru la thlaphang te an la awm. Tunah Politics kal sual avangin Kuthnathawktuten nasa takin an tuar a. Rim taka an thawhrah te chuan Kuthnathawktute lungawi lohna a cho chhuak mek a, Mizoram hian thil duhawm lo tak kuthnathawktute Lungawi lohna hi kan tawn mai a hlauhawm a ni,” a ti.
Pu Lal Thanzara chuan Mamit district chhunga NLUP atanga dinhmun duhawm tak taka ding ta te a hmunah tlawhin an hmalakna enpuiin, Congress chuan NLUP changtlung zawk hmangin Mizoram mipuite tan hna a thawk leh dawn a. NLUP changtlung zawk hi Mizoram mipui hmun hrang hranga miten an nghakhlel tawh hle. Tunhnaiah Mizoram hmun hrang hranga Congress party a lo haw tum te pualin hun hman a ni chho dawn, a ti.
Pu Lal Thanzara chuan, Thinghlun rama Assam nena ramri chu tlawhin hmun hlauhawmwm leh engmah hnianghnar pawha mamawh hmuh ma theih lohna hmuna rinawm taka ram tana vengtu hnathawktu 4th IR battalion awmte a chhuan thu leh Mizoram mipuiin kan thlamuanpui zia te sawiin, an dinhmun chu sorkarin ngaihtuah sak leh enpui a tul hle tih a sawi.
