Vawiin February 8, 2025 (Inrinni) hian MPCC President Pu Lal Thanzara’n Bungkawn Vengthar ṬANGRUAL FIELD a tlawh a, MPYCC President Pu Laltawnliana leh MPYCC hruaitute pawhin Republic Veng-a ZPM worker te hnathawh a hmunah an enfiah bawk.
Bungkawn Vengthar ṬANGRUAL FIELD tia hriat hi Chief Minister hlui Brig. Thenphunga Sangha dil thin niin khawtlang mamawhna avangin kum 20 liam ta khan tuna MPCC President Pu Lal Thanzara’n ama mimal pawisa in khawtlang infiamna hmun a tan a lei sak a. Khawtlang hnatlangin a laih hna leh a siam hna an thawk a. Aizawl Municipal Council Ward No. XV Corporator Pi Zodingpuii’n Futsal, Basketball leh Volleyball khelh theihna turin a siam puitlin sak a ni. Tunah hian Tangrual Pawl hian Bungkawn Vengthar YMA kutah a enkawl hna an dah a. Bungkawn veng leh thenawm veng hrang hrang infiam miten an hlutin a tangkai hle a. Infiamna hmun an neih theihna tura hmathlir thui tak neia leisaktu Pu Lal Thanzara chungah lawmthu an sawi.
Vawiin Febuary ni 8.2025 (Inrinni) vek hian MPYCC President Pu Laltawnliana leh MPYCC hruaituten nikum 2024-a Mizoramin Redbull Event kan thlenna hmuna an hman Republic Biakin thlang step, a veng mipui pawhin siam ngaia an hriat lem loh kha landing pahnih paih in step 24 rem tha in mipui sum Rs. 4,00,000/- teh meuh an seng a. Step siamna senso leh a thawktu hming ziahna bel pawh tarlang ngam lovin bill lakna tur thlalak chhung chiah tarin lak bo nghal a ni.
He step siam tlawhtu MPYCC President Pu Laltawnliana chuan, Mipui sorkar siam tuma Kuthnathawktute thlai thar lei tura inzuar ZPM sorkarin an intiamna kuthnathawktute Hmunphiah chin pawh an leisak theih loh laia thil tul lo leh party mi induhsakna uchuak tak hmanga mipui sum hetiang zat sen hi Mizoram mipui leh Kuthnathawktute zah lohna a ni a, enchhin tlak an ni loa, an chungah rinna nghah ngam a ni tawh lo, tih sawiin Pu Laltawnliana chuan, tun An duh ang anga an kawih-her theih Local Council neih a hlauhawm a. Aizawl South-I mipuite pawhin a bialtu MLA leh LAD Minister Pu C. Lalsawivunga’n AMC inthlana a inzawrhna thin, ruling sorkarin an duh duha an hruai kawi mai mai Local Council leh Village Council ni lovin sorkar check tu tur Opposition VC leh LC an thlan a ngai a, chu chu LAD Minister duh dan a ni a, Mizoram mipui pawhin hei hi tihhlawhtlin sak ngei turin ka ngen a ni, a ti bawk.
MPCC President hi Aizawl Municipal Council, Ward No. XV Corporator Pi Zodingpuii, Pu Lalngaihawma, Secretary MPCC, Pu Khawpuimawia Treasurer MPYCC, Vanlalruata, Secretary MPCC, Elizabeth Malsawmtluangi, Zodinsanga, General Secretary leh PC Zothansanga Secretary MPYCC ten an tawiawm a ni.
