Vawiin, February 7, 2025 hian Dr. Lallianchhunga, MPCC Spokesperson leh Pu Lalhmingthanga Pachuau, President, Aizawl District Congress Committee (ADCC) te chuan Thingsulthliah a Sawhthing lei khawmna hmun, Secondary Collection Centre an tlawh a, a chhehvel khua a Sawhthing chingtu mi engemaw zat te nen inkawm hun an nei nghal a ni.
Sawhthing chingtute nena an inkawmna atanga an thil hmuh dan sawiin, Dr.Lallianchhunga, MPCC Spokesperson chuan, “Thlai thlan bik lei tura an intiamnaah ZPM te Research based an tih hi a hlawhchham chiang hlein kan hria. ZPM Research based in Hmunphiah leina atana hun tha pawh an hre lo va, Sawhthing leina atan hun tha pawh a liam leh ṭep tawh. ZPM te hian Road Map mumal an lo nei lo. Mipui nawlpui te awih atan sap tawng thumal an hmang mai mai a ni. Market a inrawlh dan tawk an thiam loh avangin kuthnathawktuten an thil thar chhuah hralhnaah tun hma an pha lo zawk. Ruah tui tlak hma ngeia kuthnathawktute Sawhthing lei vek turin ruahmanna an la siam lo niin kan hre bawk a. ZPM te hian Sorkar kal tawh te tawngkam thiam taka sawisel bak thiam an nei lo em ni chu aw, kan ti” a ti.
Thingsulthliah tlang dunga kuthnathawktute an kawmnaah hian ADCC President Pu Lalhmingthanga Pachuau chuan, Thingsul tlang dungah hian Sawhthing ching an tam lo va, kuthnathawktu ṭhenkhat te pawhin ZPM sorkar policy an chhawr vakna tur an hriat loh thu anlo sawi a, NLUP kha an ṭangkaipui zawk thu an sawi a ni. Chutihrualin, sorkar chu kan ram nu leh pa a nih angin, Mizoram khaw hrang hranga kuthnathawktute an beidawn loh nan, an hah man phu tawk zela an kut kawih hnathawh hah man an hmuh ngei theih nan chak taka hmalak pui tul a tih thu a sawi a.
Pu Lalhmingthanga Pachuau chuan Sawhthing hralhin kan ram boruak a luah hneh hle thu sawiin, ‘ZPM in sorkarna an siam hma a beisei nei tura kuthnathawk, Sawhthing chingtute hnena an sawi thin kha an ti hlawhtling lovang tih ka hlau a ni’, a ti. ‘Kuthnathawk a ei zawngtute moral tih chhiat theihna, beiseibo leh beidawnga insiam theihna a nih avangin, furpui lo thlen hma ngei a Sawhthing, Hmunphiah leh a dangte leisak chungchangah chak taka hma la chhunzawm a, rual khai taka leisak vek turin sorkar ka ngen a ni’ a ti bawk.
