Mizoram Pradesh Congress Committee chuan Lal Thanhawla Auditorium-ah tun hnaia Local Council leh Village Council a party tana dingte hnenah lawmthu sawia Cetificate Hlanna hun an hmang.
He hunah hian MPCC President Lal Thanzara chuan VC leh LC inthlana dingte hnenah lawmthu sawi leh fuihin, “Development tinah sorkar kutke kan nia, kan tel lovin veng chhungah development a kal thei lo. Pathian tih (trih) chunga rinawm taka khawtlang tana kan thawh hian ram tana thawk kan ni.
“VC leh local council hian ngaih pawimawh inhlawh hle a, Kan enchhin sorkar pawhin term hmang zo lovin inthlan min neihpui thuai thuai a ni. Ram inrelbawlnaah VC/LC te hi a mawngphah angin lang mah ila, a pawimawh ber kan ni kan tithei awm e.
“Min enchhin rawh u ti, ZPM enchhin sorkar kan nei mek a. Airport suasam an tum danah kan enchhin tawh a, kan enchhin atang hian political party hrang hrang leh NGO te chuan mark kan pe sang lo hle a ni.
“An intiam angin Kut hnathawktute ngaihsak leh duhsak bik tura an insawinaah hmunphiah chungchangah nikum lamah kan enchhin a, hmunphiah chingtute tan beisei a bo in an khawngaithlak hle a ni. Kum dangah kan hunlai tea a nuai tela a hlawkna an tel laiin kuminah an heh a hil hle. Hmunphiah lei chungchangah enchhin sorkar hian pass mark an hmu lo.
“In kawtkaiah kg-ah Rs 50 in kan rawn la ang tia sawhthing ching tura min fuihtute kan enchhin mek a, an intiam angin an awm lo mai ni lovin, hahtaka beiseina sang tak nena sawhthing ching a, beiseina sang tak nena enchhin tute thinlung an ti na chho mek a ni. Hei hi kan enchhin sorkar dinhmun a ni.
“ZPM te sorkar theihna chhan ber chu kum 30 chhunga Congress leh MNF in sorkar chhawk khan ram tan engmah an ti lo an tih kha thalai ten an awiha an sorkar theih phah a ni.
“Sorkar kalta te khan engmah tih nei lo ni se, tuna ZPM sorkar a Chief Minister hian Chief Minister thutthleng hi a luah lek lovang. Mizorama remna leh muanna awm theih nan lal thutthleng kianin chu mi avang chuan democracy takin sorkar a kal thei a, chu mi zarzo chuan vawiin hian ZPM pawh sorkarin CM dinhmun an luah thei a ni.
“Reliance company neitu Mukesh Ambani an mo a neih dawn khan Chief Minister a rawn sawm a, a private jet a rawn thawn a. Chungte pawh chu Congress sorkar kalta te khan tih lo neilo chu ni se, Silchar-ah tlan thla in chuta tangin a thlawhna lo thawnah a chuan a ngai dawn a ni. Mahse, chu chu ngai lovin kan buzawl Lengpuiah ngei airport tha tak kan lo siam avangin ropui takin mihausa private jet-ah a chuang ta a nih kha. Sorkar kalta te khan thil zawng an lo ti nameuh mai.
“MNF pawh hian inthlan dawn a piangin thutiam ropui tak tak an nei thin. Mahse Economic leh development-ah a hlawhtling sawi tur kan nei em? A hmasa berin independent min tiam a, kan chan chu hmeithai tam tak siam a ni ringawt mai, chutah state ralmuangah kawng chhawng siam te mintiam a, kawngchawng siam kan nei lo va, leiverh inkal pawhna pawh kaw pakhatmah pawh an la verh lo va. Cheng sing sariha kut hnathawktute tanpui min tiam a, tumahin singsarih an dawng lo va, cheng nuai thum lai NLUP dawng tawh pawhin in dawng ang an tia, tumahin nuai thum chu sawi loh nuai khat pawh kha intiamna atang khan dawng an awm awm love.
“VC leh Local Council level atang hian Mizoram mipuite i inharh ang u. Intiamna kawrawng mai maiah innghat tawh lovin, Congress a thutiama a din thin dan te, MNF hnuaiah ram a ralmuang em, hma kan sawm em tih te, ZPM kan hrawn meka kan intiam anga kan awm loh chuan kei chu Chief Minister nih pawh ka duh lovang titu a CM mek a, an intiam angin an awm em kan enchho mek dawn a ni.
“Mizo mipui ten Politics kan khelhnaah hian harhna i chang ang u. Kan ram tana tihtaktaka tite leh tihtakzet chhuah leh chhuah lotute fimtaka thliar hrang thei kan ni,” a ti bawk.
Certificate Hlanna Inkhawm hi Ronald Sapa Tlau, Vice President MPCC in a kaihruai a, hunserh Dr. Lalmalsawma Nghaka, Treasurer in a hmang a. Lalnunmawia Chuaungo, Sr. Vice President leh R.L. Valla, Vice President te chuan certificate hlanna an nei bawk.
