MPCC chuan thuchhuah siamin, “Congress Party hian mipuite duhsaknain Mizoramah sorkarna a lo siam tawh thin a. Duhthusam ni lo mah se, Mizoram hmasawnna lian tham tam zawk hi Congress sorkar ruahman leh a tih hlawhtlin a ni deuh vek a ni.
“Lunglei khawpui tana Congress Party-in hmasawnna a lo thlen tawh zawng zawngte hi sawi vek sen a nih loh avangin a then a zar chauh lo tarlang ila (mi thenkhatin kan tih loh lai hlir an sawi chuan, kan thil tih tlemazawng tal sawi ve a ngai a ni) :,” tiin a hnuai ami ang hian thuchhuahah chuan an tarlang.
1. High Powered Committee, Lunglei: Mizoram a District dangten an neih ve miah loh, Lunglei District a hmasawnna hna nasa taka thawktu Lunglei High Powered Committee hi Congress sorkar din leh thuam chak a ni a, Chairman chu Chief Minister niin, Lunglei atanga thlan tlin MLA-te Vice Chairman an ni thin. Hei hian Congress Party-in Lunglei a ngaihthah loh zia leh a ngaihsak thin zia a tichiang hle. High Powered Committee hmang hian Lunglei hmasawnna hna tam tak thawh a ni a, a tangkai zia hretu chu Lunglei mipui an ni. Kum 2009 khan Congress sorkar bawkin District Planning Board nen khaikhawmin, chak lehzuala hnathawk theiin HPC chu a siamtha leh a, Budget hi kumtin cheng vaibelchhe 6 vel a nei ve reng thin. Tin, Congress sorkar khan High Powered Committee Office tur hi a hranpa liau liauin a sa bawk. Anmahni inrelbawl thei tura Lunglei mipuite hnena thuneihna petu chu Congress party hi a ni.
2. Lunglei By-Pass Road: Lunglei khawpui kawng a chep avangin Congress Sorkar lai khan Lunglei By Pass Road siamna tura nasa taka hma lain, NEDP atangin Congress Sorkar chuan cheng nuai 900 a dah a. Pu Zoramthanga sorkar chuan hmang zui duh lovin, ‘Survey-na pawh a daih lo’ tiin hma a la zui duh ta miah lo a. By Pass road siamna tur sum pawh thil dangah a hmang ta daih a ni. Lunglei by pass road siamna tur hi Congress sorkar lai khan Survey neih vek a ni tawh a. Amaherawhchu, MNF Sorkarin kum 4 chhung pawha Bawngtuthlawh vawi khat pawh ala chek duh lova, hma ala duh lo hi Lunglei mipui hmuhsitna lian tak a ni.
3. Mizoram Engineering College: Congress Ministry liam ta khan Pukpui, Lungleiah Mizoram Engineering College tur dinin, College building hi RUSA atanga dawn cheng Vaibelchhe 26 senga sak a ni a. He sum hmang hian Aministrative building, Academic building, Workshop & Laboratory, Library, Mipa leh hmeichhe hostel, Canteen, Cafeteria, zirlaitetan Common Room te sak a ni. Tui, a panna kawngpui, Electric leh thil pawimawh dangte chu Mizoram sorkar tum tur a ni thung. He College hi February 3, 2019 khan Prime Minister Narendra Modi chuan a hawng a. 2019-2020 Academic session atanga Civil Engineering Department tan tura ngaih a nih laiin MNF sorkar hnuaiah tan theih a la ni ta lo a ni.
4. SYS Football Academy: Congress sorkar lai, kum 2015 khan Lungleiah SYS Football Academy din a ni a, a hlawhtling hle. He hmun atang hian Lunglei thalai, profesional footballer Lalrempuia, Lallianzuala Chhangte, B. Lalnuntluanga, V. Lalengzama, Rohmingthanga leh Lalliansanga leh midangte hlawhtling takin an lo chhuak tawh a. Tunhnaia Lunglei District atanga professional footballer-te hi SYS Academy chhuak an nih loh vek pawhin SYS Football Academy kaltlang a Mizoram aiawha fehchhuakte an ni hlawm. Professional huanga lut tawhte Mizorama an rawn haw changa an training-na ber a ni. Hei hi Congress sorkar laia siam a ni.
5. Convention Centre, Lunglei: December ni 20, 2011 khan Pu Joseph Lalhimpuia, MLA, khatih laia HPC Vice Chairman chuan Covention Centre lungphum hi a phum a. September ni 16, 2016 khan khatih laia Chief Minister Pu Lal Thanhawla chuan Lunglei-ah Mizorama Convention hmasa ber Convention Centre Lunglei, cheng nuai 1877.40 senga sak chu a hawng ta a ni. Lunglei khawpui hmasawnna atana Congress sorkar hnathawh chhuanawm tak pakhat a ni.
6. Thuamluaia Mual: Congress sorkar lai November ni 10, 2009 khan LDSC Ground-I ni thin chu C.Thuamluaia Mual tia thlak a ni a, September ni 26, 2011 atangin cheng nuai 397.523 sengin Phullem phah tan a ni a. March 12, 2012 khan khatih laia CM Pu Lal Thanhawla’n a hawng ta a ni.
7. Lena Stadium: Congress sorkar liam ta khan kum 2017 atangin cheng nuai 2418 sengin Lena Stadium a sa tan a, MNF sorkar hnu, December ni 5, 2019 khan Deputy Chief Minister leh UD&PA Minister ni bawk Pu Tawnluia’n a hawng. Lungleiah hian Congress sorkar liam ta khan Sports lamah hmasawnna hna a thawk nasa hle a. Lungleia infiamna hmunhma tam zawk, Thuamluaia mual leh Lena Stadium bakah hian Melte field-te, Chanmari, Electric leh Ramthar venga Indoor Stadium sak te, Zobawk Sports Complex, AP tlanga Tennis Court-te leh a dang tam takte hi Congress sorkar laia siam vek a ni.
8. Lunglei Water Supply Scheme: Tuna Lungleiin kan rin mek Water Supply Scheme hi Congress sorkar laia siam leh hawn a ni a, Greater Lunglei Water Supply Scheme tur pawh Congress sorkar laiin ruahmanna thui tak kalpui hman a ni.
9. MZU Southern Campus: Congress sorkar khan Lunglei a MZU Southern Campus din a nih theih nan hma a la nasa hle a. A bikin Pu Joseph Lalhimpuia, MLA khan hma a la nasain a bawhzui nasa hle. Congress Party chuan Lungleia MZU Southern Campus a awm theih hi a duh takzet a ni.
10. Lunglei World Bank Road: Aizawl – Thenzawl- Lunglei World Bank road, km. 164 a thui hi Congress sorkar lai, kum 1997 atanga engkim ruahmanna kalpui a ni a, kum 1998 atanga thawh tan a ni. India leh US sorkar inlaichinna that tawk loh avangin hun engemawchen hnathawh a khaihlak a, kum 2002 atanga ngawrh taka thawh zawm leh niin, May 11, 2011 khan khatih laia Chief Minister Pu Lal Thanhawla, he kawng siamna atana hmalakna bul tantu chuan Melriat-ah a hawng ta a ni. He kawng hi kawng hmasa, Serchhip paltlang kawng aiin km. 71 zetin a tawi zawk a, a tangkai zia hretu chu Lunglei leh chhim lam mipuite kan ni e.
11. RTPCR Khawl:COVID-19 hripuiin min nuai a, laboratory indaih lohna a nasa hle. Hetiang a nih avang hian kum 2020 June 26 khan Thorang bialtu, Pu Zodintluanga Ralte, CLP Leader chuan hripui laka Lunglei mipuite an him theih nan tiin RT-PCR khawl chu Lunglei a dah turin MNF Sorkar a pe a. Amaherawhchu, MNF sorkarin COVID-19 hmuhchhuahna Laboratory chu bun loh dan ringawt a ngaihtuah a, Lunglei hmangaihtute’n PIL an thehlut a, Court-ah an nawr a ngai hial a. Court-in bun ngei tura a tih avangin Tourist Lodge building-ah chawpchilh taka din a ni ta a nih kha. Thih leh dam inkara Lunglei mipui an awm laia an koh eih phak loh MNF Sorkar hi Lunglei mipuite hian vote nawn hi an ba lo a ni.
12. Education Complex & Guest House: Congress sorkar khan Lungleiah DoNER sum cheng nuai 1040 sengin School Education Complex leh MBSE Regional Office, Lunglei a sa a, July 8, 2022 khan CM Pu Zoramthanga’n a hawng a ni. Hei bakah hian Education hnuaiah Office leh School building tam tak sak that a ni bawk.
13. Laldenga Park, Kawmzawl, Pukpui: Pu Laldenga, MNF President hming chawiin Congress sorkar khan Pukpuiah Laldenga Park, cheng nuai 185.90 sengin a siam a, September 24, 2013 khan khatih laia Chief Minister Pu Lal Thanhawla’n a hawng a ni. MNF sorkar hnu hian enkawl a hlawh ta vak lo niin a lang.
14. Sorkar Office Building tam tak: Congress sorkar khan Lungleiah sorkar building tam tak a sa hman a, heng Building tha tak takte hi tun thlengin tangkai taka hman an ni hlawm. Congress sorkarin Lunglei khawpui tana hna a lo thawh tawhte hi sawi vek sen a ni lo a ni.
“Congress Party hian a chhe thei ang bera beih a tawk thin a, hmasawnna hna thawk miah lo anga chhuah a ni fo thin. Amaherawhchu, Lunglei mai ni lo, Mizoram a hmasawnna liantham zawng zawng deuhthaw hi Congress sorkar hnathawh rah a ni deuh vek zawk a ni tih hi mi thil chik mite chuan an hrechiang em em a ni.
“Lunglei khawpui hian chhantu a mamawh a, duat taka enkawltu tur a mamawh. MNF Sorkar hian Lunglei mipuite hi hmangaihna leh duhsakna tak tak a nei ngai lova. Vawiin niah ngei pawh Lunglei Municipal Council hi Lunglei mipui tam takin an duh lo chungin ‘kan Sorkar laia kan din’ an tih theih nan Lunglei mipuite barhluih an lo ni dawn ta a, inthlan hmachhawn a lo ngai ta a ni. Lungleiin harsatna a tawh laia MLA ngawi reng te ang tho va, Pu Zoramthanga hnena engmah sawi ngam lo tur MNF atangin LMC Councillor tur i thlang lovang u.
“ZPM te pawh hi midangte thatna lai hmu duh miah lo a, an chhiatna lai zawng ngar ngar tute an nih avangin ZNP an nih lai atang tawhin mipuiten an kutah rolrelna an pe duh lo. Tin, PHOLENG Youtube Channel in Pu Lalduhoma a kawmnaah khan Officer eirukna pawh a ziaawm ti duh mai a ni a;ZPM CM Candidate hi mipui sum eirukna (corruption) do tak tak ngam lo tur, Officer eiru thin te nena inthurual hreh miah lo tur a ni tih a chian avangin an kutah rorelna pek tlak a ni lo.
“Lunglei mipui inpeih hma a inthlan buatsaih tur ni mah se, Lunglei hmasawn duhna avanga thehnemngai taka vote thlak theuh turin Congress Party chuan Lunglei mipui kan ngen a. Congress Party-in Candidate kan chhawp chhuahte hi mi tha ber ber, mi fel ber ber te an ni lovang tih kan ring. Amaherawhchu, kan ram leh hnam leh Lunglei khawpui chhan tur leh enkawl tura lo penchhuak an nih avangin Congress Party candidate-te lo vote theuh turin Lunglei mipuite kan ngen che u a ni,” an ti bawk.
