Dated Aizawl, The 8th November 2024: Vawiin chawhnu dar 1:00 PM khan 1st Telephone Advisory Committee (TAC) Meeting chu Chief Wildlife Warden Conference Hall MINECO ah Pu Richard Vanlalhmangaiha MP (LS) kaihhruaina hnuaia neih a ni a. Hetah hian TAC member thahnem tak district hrang hrang atangin an kalkhawm a ni.
Pu Richard Vanlalhmangaiha MP (LS) chuan,”Kan ram hmasawn nan tiin ram hruaitute hian ke kan pen chhuaka, Pathian leh mipui zarah kei ngei pawh MP Lok Sabha atan thlantlin ka lo ni ve ta a, kan state hmasawnna turin kawng hrang hrangin ke kan pen mek a ni. He kan hun hlu tak neih chhung hian kan ram tana thil tha leh hmasawnna hriat reng tlak thangthar zel turte tana hnutchhiah hi ka thupui a ni a, chuvangin ka hun neih chhunga hmasawnna tam thei ang ber kan ramah a thlen theih nan central Sorkarah theih tawpa hmalak zel ka tuma, state sawrkar tan MP thawhhlawk tak nih hi ka hmathlir a ni. Vawiina First Telephone Adivisory Committee Meeting kan nei thei hi ka lawm hle a, inbiakpawhna lama hmasawnna thar kan neih zel theihna tura hmalakna pawimawh tak a nih avangin, mipui tana rawngbawlna a ni tih hria a, TAC member te leh BSNL hnathawktute pawh thahnemngai taka thawk tur leh thawhhona tha tak nei zel turin duhsakna ka hlan a ni,” a ti.
He meeting ah hian BSNL Mizoram Bussiness Area (BA) Principal leh General Manager ni bawk Pu Arumaya Dakua ITS chuan member kalkhawmte lawmna thu a sawi a, Pu Lalthanhawla AGM(EB) in power point presentation pein BSNL hmalakna te leh hmachhawp hrang hrang te a en tir a, Pu Biakthianghlima Chenkual DGM(Hqrs) in lawmthusawina hun a hmang bawk a ni.
