Mizo National Youth Front (MNYF), Headquarters, Aizawl, Mizoram chuan vawiin khan thuchhuah siamin, “Mizo National Youth Front chuan November ni 3, 2022-a Lawngtlai AOC vengah, Francis Rochungnunga (30) S/o Chhiahkama (L), Line Man (MR) chu power line chhia a siam laia electric current man avanga boral ta chu pawi a tiin, thinlung takin a ui takzet a, a kalsan tak a chhungte zawng zawng chu Pathianin thlamuana awmpui zel turin a duh tak meuh meuh a ni,” an ti.
Thuchhuahah chuan, “Power Minister Pu R.Lalzirliana chuan he thil thleng a hriat rualin a mawhphurtute zawn chhuah chungchangah November ni 4 (zirtawpni) chhun dar 12 rik hma ngeiin hremna lek anih tur thu leh, LADC Chief Executive Member Pu V.Zirsanga kaltlanga a hriattir nghal kha MNYF chuan lawmawm a ti takzet a. Mawhphurtu a puh P & E SDO suspend nghal a ni leh Control Room-a duty pawh Criminal Case siamsak nghal an nih avangin Pu R.Lalzirliana hi MNYF Headquarters chuan a chhuang takzet a ni. Huaisen tak leh chak taka a hmalakna hi kan thlawp tlat a ni.
“P & E Minister Pu R.Lalzirliana hian he thil thleng hi Cable TV kaltlangin mipui hmaah pawh pawi a tihzia a sawi a. Hman ni lawka Rulkual lama current man avanga boral tate pawh pawi a tihzia a sawi bawk a. Tun thil thlengah pawh cyber crime hial an ruai a, fimkhur lo taka thil tihfo hi a duh lohzia thlengin a sawi a. A titu dik tak hi MR an nih chuan ban nghal a tum thu leh sorkar hnathawk nghet an nih chuan hrem loha chhuah a tum loh thu a sawi mawlh mawlh laia Congress thalai (MPYCC), ZPM, BJP leh AAP-ten moral responsibility la a bang tura an lo phut chhen kha MNYF chuan politics thila initsikna mai niah a ngai a, a thawka phita ‘bang rawh se’ tih fo hi sim tawh turin eptu party thalaite a ngen nghal bawk a ni,” an ti bawk.
