Vawiin August ni 4, 2023 (Zirtawpni) hian Golden Hall, Congress Bhawan-ah Friday Political Session neih a ni a. He hunah hian Pu Lal Thanzara, Vice President MPCC in thu a sawi.
He huna thusawitu Pu Lal Thanzara, MPCC Vice President chuan, tuna MNF sorkarin min thlenpui theih awmchhun chu leiba ngah ber state nih a ni a. Heti chung hian ram tana tangkai lo PAHOSS an sem a, nuaithum tiamin Rs.25,000 an sem nel nual a. Nationalism sawi chungin damlo pawisa leh sorkar hnathawk hlawh an bat sak a, nationalism sawi chungin Zohnahthak kan unaute nasa taka sawisatu BJP an thawhpuina an chhu chat ngam lo a, MNF te Nationalism sawi leh keini Nationalism sawi hi a inang lo a ni, a ti.
Pu Lal Thanzara chuan, MPCC President Pu Lalsawta’n thahnemngai takin kan hnam leh kan sakhua him nan Mizoram a Political Party zawng zawng te, Kohhran leh NGO te chu BJP do a, Kristian sakhua nekchep tumtute dopui turin a sawm ngam laiin, inthlan hun atana BJP pawisa leh an chakna chhawr tangkai tum ZPM Chief Ministerial Candidate hian BJP do turin Mizoram mipui a ngen ngam lo a, Mizoram a BJP siam len tumin BJP an len theihna tura kal kawng tur a duanpui a, hetiang khawpa kan hnam min nuai lai hian, BJP kan thawh pui lo ang tih ka sawi thei lo, a la ti duh chauh a ni, a ti.
Kumin kum tawpa inthlan tur hi kan hnam leh kan sakhua awmzel dan tur hriltu a ni dawn. Tunah hian state hrang hranga Kohhran leh Para-church hnuai Missionary te dinhmun a him lovin harsatna hrang hrang an tawk nasa zual hle a. Hindu sakhua chawivung tuma BJP hmalakna hi a tak taka kan vei a hun tawh takzet. Tunah hian Hindu Puithiam te chuan Kristian nuai chimih tumin ngampa takin an che chhuak a. Kan sakhua leh kan hnam himna turin Party a kan awmna thlan dik a tul. Manipur a kan unaute nunna tam tak a ral a, chenna in leh lo tam tak tihchhiat sak an ni a . Hmeichhia te zahawmna tih bawrhban sak niin Pathian Biak In za tel tihchhiat a ni. Heti chung hian MNF chuan BJP a zawmna an chhut chah ngam loh avang hian kan hriat loh hlanin kan sakhua leh kan hnam lungphum hi sawinghin a ni mek. Kan ram, kan hnam leh kan sakhua himna tura thawk thei Party kan thlan a ngai a ni, a ti bawk.
Bhawan Friday Political Session hi Pu Lalhruaitluanga Bawitlung, MPCC Secretary in a kaihruai a, Pu Lalnunmawia Chuaungo IAS (Rtd), Rev. L.R Colney, Secretary MPCC & Operation E-Roll leh Pu S. Lalrinawma, Secretary MPCC & Election Department MPCC ten report ngaihnawm tak an pe bawk.
