South Tuipui bial chhunga MNF Block pathum – Block-I, Block-II leh Block-III te chu vawiin khan Hnahthial-ah inhmukhawmin Resolution hetiang hian an pawm :-
1. Inthlan dawna MNF party in mipuite hnena kan tlangau pui Manifesto hrang hrang te chu Chief Minister Pu Zoramthanga kaihhruai sorkar in a ti puitling zel leh tanpui ngaite dawm kang tura SEDP chak takin a kalpui chho hi lawmawm kan tiin kan thla a muang takzet a ni
2. Hnahthial leh a chhehvel mipui ten hmasawnna rahka kan rah theihna tura kan mamawh em em Congress sorkar in min tih hlawhtlin sak theih loh Hnahthial District Headquarters chu Pu Zoramthanga kaihhruai sorkar-in min pe leh chak taka min tih hlawhtlin sak hi kan lawmin Sorkar Pisa pawimawh leh lian tak tak kan nei ta a. Hnahthial District tih changtlun zelna turah pawh Pu Zoramthanga kaihhruai MNF Sorkar hi kan ring tawk a ni.
3. South Tuipui bial mipuite tana Nu leh Pa nih tling zo tak bialtu MLA atan Pathian tih mi, Dr.R.Lalthangliana kan nei hi lawmawm kan tiin kan chhuang a, kan bial leh ram tana a hmalakna hi kan thlawp tlat a, a hnung kan zui zel dawn a ni.
4. Kan bialtu MLA Dr.R.Lalthangliana thahnemngaihna leh inpekna avanga Zoram mipui ten kan mamawh em em Health infrastructure tha tak tak kan nei chho mek hi kan ngai hlu in a hmalakna fakawm kan ti.
5. Congress sorkar liamta in min hnuchhawn leh ngaihthah avanga bial rethei tak kan nihna atanga min khaichhuak tura bialtu MLA Dr.R.Lalthangliana’n inkalpawhna, Hriselna, Zirna leh kawng hrang hrangah hmasawnna hmelthar min chhawpchhuah sak te hi ropui kan ti hle a ni
6. Covid-19 hrileng kara kum 3 leh thla 4 vel lekah pawh South Tuipui bialin hmasawnna hrang hrang kan hmu hi bialtu MLA taima leh a ngaihna hria Dr.R.Lalthangliana kan neih vang a ni tih kan chiangin kan bial nu leh pa a nih zel theihna turin theihtawp kan chhuah zel dawn a ni