Chalfilh bial chhung Suangpuilawn khua-ah September 26, 2023 (Thawhlehni) zan khan ZPM Suangpuilawn Unit buatsaihin Community Hall-ah neih a ni a, khawtlang mipui thahnem tak an kal khawm.
Inkhawm hi Lalrinngheta, VC Vice President-in a kaihruai a, Pastor Lalremruata’n hunserh hmangin, ZPM Leader Lalduhoma leh Chalfilh Bial ZPM MLA Candidate Lalbiakzama te bakah Er.Vanlalneiha Ralte, PAC Member ten thu an sawi a, zaithiam ten hun an hmang bawk a ni.
He hun hmanpuitu ZPM Leader Lalduhoma chuan thu sawiin, “Suangpuilawn khua chu mi taima khua tia hriat thin leh zirna lama mi hlawhtling Mizoram sawrkar hnuaia hna pawimawh tak tak chelh mek te, Pastor leh mi chhuanawm tak tak te khaw chhuahna a ni a, chutih lai mekin hmasawnna kawnga ngaihthah khua in la ni reng mai hi a pawi ka ti hle a ni,” a ti.
Lalduhoma chuan, “Vawiina sawrkar ding lai chu MNF Party te an ni a, ZPM chu opposition party lian ber kan ni mek a. Mizoram-ah mipuiin sawrkar lai an nin tawh reng rengin opposition party lian ber chu sawrkar lai thlaktuah kan hmang thin a. Chuvangin ZPM te chu 2023 MLA election-ah Pathian leh mipui zarah sawrkarna kan chan ngei a rinawm ta hle a, party pawh sawrkarna chang turin a inbuatsaih fel ta hle a ni. Kan Bible zirtir dan leh Mizoram rorelna kalphung chu thil inmil lo tak a ni a, MNF leh NDA thawk dun tlat mai te hi thil mak a ni.
“Manipur buaina vanga Lok Sabha-a No Confident Motion chungchangah pawh khan MNF sawrkar chu huai taka au chhuak angin lang mah se, Parliament-ah a duh lo tute lam an chhuah vek laiin kan MP chu chhuak ve lo te zingah a tang leh tlat mai te kha thil mak a ni. MNF party hi BJP sawrkar thawhpui tlattu an ni tih hi Mizo mipuite hian kan hriat a ngai a ni. Chutiang bawkin Congress party pawh tun hnaia Chakma area inthlanah BJP te nen an thawk ho a, Congress hruaitu lu Rahul Gandhi-a ngei pawhin Hindu party kan ni tiin a au chhuak hial a ni. Kan sakhua a lo him theih nan mipui ten ngaihtuahna kan sen a ngai a, ZPM party chiah hi central party zawm ve lo, an thu thu a awm ve lo tur leh thutlukna mahni a siam thei tur kan ni,” a ti.
Chalfilh Bial ZPM MLA Candidate Lalbiakzama chuan, “Chalfilh bial chhunga khaw thenkhatte chu hmasawnna thlawhkhum leh zangkhaw bungbut hnan khua tia sawi te an awm hial a. Suangpuilawn khua ngei pawh hmasawnna tur kawng tam tak nei khua in la niin ka hria. ZPM a lo sawrkar a nih chuan kalphung thar hmangin hmasawnna ko kan thlak ve tawh ang a, he khua leh bial mipuite hian kawng hrang hrangin hma in sawn ve tawh dawn a ni,” a ti bawk.