Ni 2.7.2024 (Thawhlehni)-a Lunglei District High Powered Committee Conference Hall-a Cabinet Meeting, Lungleia neihah sorkar chuan Petrol leh Diesel chhiah (VAT) 2 % -a tihsan turin thutlukna a siam a. Ni 3.7.2024 (Nilaini)-a Aizawl Press Club-a Supply Minister Pu B. Lalchhanzoa’n Cabinet rorel in a pawmpui tawh Mizoram sorkarin ration Buhfai mipui hnena kg 1 cheng 15 a pek thin chu a leta tipungin kg 1 cheng 30 zela lei a ngaih tawh tur a sawi bawk. Petrol leh diesel man tihsan tur leh ration buhfai man zaa za dawrh maia a pung tur hian Mizoram mipui a thawng takzet a. Mirethei leh harsa zawkte khawsak a ti harsa zual dawn hle a ni, MPYCC chuan an ti.
MPCC Treasurer Dr. Lalmalsawma Nghaka chuan, “Petrol leh Diesel chhiah tihpun a ni tur hian nasa takin Petrol leh Diesel man a tih san phah nasat hle dawn avangin lirtheia sumdawng mai ni lo, nitin eizawnga hun hmangte nasa takin harsatna a siam sak dawn. ZPM sorkar hian an sorkar hmain an in zawrhnaah eng chhiah mah an tih san loh tur thu te, Tax Holiday an puan tur thu nasa takin an lo sawi tawh chuan an rintlak loh zia a tichiang ah Congress thalai chuan a ngai a ni.
“ZPM sorkar hian sum renchem sawimawi chungin an theih dan danin mipui sum an chen hiau hiau zawk a. An Party mite duhsakna turin sorkarah nihna sang tak tak siam chawpin; ZPM sorkar chuan Mizoram sum dinhmun leh an inzawrhna ber an VIP kuthnathawktute harsatna pawh ngaihtuah lovin sumthuni nu, CM adviser, Board Chairman, Consultant leh Supervisor an ruat chawp vak vak a. Tunah MC Mayor, Dy. Mayor, Executive Corporator, Corporator leh Lunglei Municipal Council Chairman, Executive Councillor leh Councillor te hlawh an tipung leh hian kuthnathawktute hmuhsitna leh palzutnaah Congress thalai chuan a ngai a ni.
“ZPM sorkarin ram sum dinhmun ngaihtuah miah loa AMC leh LMC-a Corporator leh Councillor te hlawh punna hi a sang hle a. Aizawl Municipal-a Corporator te hian βΉ 23,500/- an hlawh mek a. ZPM sorkar Cabinet meeting-in hlawh tihsan an rawtnaah chuan Mayor-in βΉ 78,000/-, Deputy Mayor βΉ 72,000/-, leh Executive Corporator βΉ 55,000/- leh Corporator βΉ 50,000/- a ni a, Lunglei Municipal Council Chairman βΉ 74,400/- , Vice Chairman βΉ 68,400/-, Executive Councillor βΉ 52,000/- leh Councillor βΉ 47,000/- teh meuh an pawm hi inrenchem sawimawi chunga mipui palzutnaah Congress thalai chuan a ngai a ni.
“ZPM sorkar hian mipuiah chhiah lak nasa takin an tipung a, khawpuia mipui aiawh thlan tlinte hlawh nasa takin a tipung chho mek a, eng tiang takin nge hetianga an chet chhoh zel dan tur hi rin thiam ngaihna pawh a awm lo a ni. ZPM insiamthatna khawmpui hming vuaha ni 16 August 2018-a Vanapa Hall-a khawmpui an hman tumin Pu K. Sapdanga chuan, Tangrual pawl a sorkar chuan Mizorama pung chak ber tur chu tuthlawh chherna βPumβ a nih tur thu sawiin, βPhaiβ chak ber tur pawh Aizawl Population a ni tih a sawi a, Mahse ZPM sorkara pung nasa ber chu chhiah leh an duhsak zawngte hlawh a ni.
“Pu Vanlalhlana pawhin an sorkar hunah chhiah an tihsan dawn loh thu a sawi a, Electric leh tui bill leh chhiah dang te pawh an tih pun loh tur thu bakah Asian Development bank leh World bank atangin an puk ve dawn loh thu te, tul miah lova pawisa hman a nih loh tur thu a sawite pawh sorkar kal mekah hian a nih lohzia mipuiin kan hmu mek a ni.
“Council of Ministers Lunglei a thukhawmin a rel anga Petrol leh Diesel ah Value Added Tax (VAT) lak chu 2%-a tih pun anih chuan ramchhungah nasa takin harsatna a thlen dawn. Petrol & diesel man a tih to phah ngei dawn a, Motor chuan man leh hire man, Bungraw phurh man, Excavator/JCB hman man, Local taxi leh Sumo chuan man leh Petrol leh Diesel hmang khawl chi hrang hrang hman man te pawh a to dawn a, mipuiin nasa takin kan tuar dawn a ni.
“Sorkar kal ta MNF sorkarah khan chhiah nasa taka tihsan a ni a. Electric, tui, Petrol leh Diesel man nasa taka tihsan niin, heβng chhiah hrang hrang atang hian Vaibelchhe 126 (chhiah) vel mipui sawrfe in an la a. Tunah ZPM in chhiah an tihpun loh tur thu leh pawisa puk lo tura inzuar chungin, Vaibelchhe 1789 zet thla 7 pawh tling loah pawisa an puk tawh a. Hetianga chhiah an tihpun vak chhan hi an duhsak zawngte tihlungawina tura an pawisa senso khuhmawina tur tih a chiang a. Kalphung thar, enchhin tura inzuar ZPM leh sorkar kal ta MNF sorkar hi engmah danglamna awm lo an nih zia a tichiang hleah Congress Thalai chuan a ngai a ni.
“Sorkar kal tawh te’n ram mipui dinhmun an ngaihtuah avangin ration Buhfai hi man tlawm zawkin mipui hnenah an pe chhuak thin a. Mipui khawsak a awlsam phah hle. ZPM sorkarin Ration buhfai man a tih san chungchangah hian buhfai a leina aia tovin mipui min leitir a tum hi a mak kan ti hle a ni. Buhfai Supplier hnen atangin Kg. 1 zelah Rs.27.50 a an lei laiin, mipuiin Rs.30 per kg. in kan lei dawn a ni. ZPM sorkar kal dan hian Welfare State ni tawh loin an sahmim hampuarna tura Sumdawng Sorkar kan hrawn mek a ni tih a chiang a. Mipui phur tih zangkhai hi Kalphung thar, enchhin sorkarin a thei ve lo a. Petrol leh diesel chhiah a tihsan a, buhfai man a tih to vak vak laiin an duhsak zawngte vulh nan erawh mipui sum nasa takin an seng leh si hian ZPM sorkar rintlak loh zia leh ram mipui an pawisak loh zia a tichiangah Congress thalai chuan a ngai a ni,” a ti bawk.
Congress thalai chuan vawiin khan Vanapa hall kawtah cabinet thuchhuak an duhlohna hi an lantir a ni.