Vawiin khan Sinlung Hills Council General Election pualin MNF chuan khaw hrang hrangah campaign kick-off an nei a. Sakawrdai-a Campaign Kick-off a hmanpuinaah Leader of Opposition Pu Lalchhandama Ralte chuan thu sawiin, “ZPM hian State ah sorkarna mah se, chhung tin thleng phak thiltih engmah an nei lo. Thil eng eng emaw zuarin, eng ang policy pawh duangin mipui lakah intiamna hrang hrang nei ṭhin mah se, pawisa an nei lo, mipui bum nan an sawi mai mai a ni. Party dangin thlêmna chi tinreng hmangin an la rawn thlêm dâwn che u. Tu emaw dâwt sawi vânga buai tûr kan ni lo, sorkar thla 10 lek kan la hrawn chhûng hian kan ti ang an ti engmah an ti lo, kan ti lo ang an tih ang zêlin an ti zâwk a ni. Helaiah rawn inzuarin, itawm takin awm mah se, kan hmuh tawh, mita kan hmuh, benga kan hriat hmang hian thutlukna i siam ang u,” a ti.
Pu Chhantea chuan, “Hei kawtchhuah pawimawh lai kan ni a, engmah ti lovah min han puh leh dâwn a ni. Kan sorkar lai khan New Vervek aṭanga Tuivai inkar motor kal thei tawh lo black top-in kan siam ṭha leh vek. Leihlâwn pawh dawh tumin ṭumhnih kan tender a, covid leh thildang avângin chhângtu kan nei lo a nih kha! Kum 2023 covid a zawh hlimah khan national Highway double lane tûra sorkar laipuiin min puan sak tâk avângin bailey bridge-a dawh kha a theih tawh lova, permanent bridge concret-a dawh tûra tih a nih dâwn avângin kan tender hmasa ang kha a awm thei tawh lo a ni,” a ti a.
“Chumi avâng chuan inkalpawh kan duh si a tiin, nikumah kan sorkar lai khan bailey bridge dawh lailâwk tûrin hma i ruahman ang kan ti a, kan sorkar khan kan servey a, kan buaipui vek a, a leihlawn tur pawh Tuipui lei ṭhiahna leh Mat lei ṭhiahna i phurkhawm ang kan ti a, kan buaipuia kan sawi kan sawi tawh a nih kha! Vanduai thlâk takin sorkar a inthlâk a, sorkar tharah Pu Duha ngei pawh a zuk kal a, an ti ṭha ngei mai kan hmalâkna an chhunzawm a, hmaraw thar i lei law law ila, a hlui aiin i tih ang u an ti a, an ti ṭha khawp mai, hei kan hmachhawp sa an rawn ti a, a lawmawm e,” a ti bawk.
Leader of Opposition chuan, “Mahse vawiina an han sawi tak tak chu MNF khan engmah an ti lo, ZPM an sorkar a, kan dawh dâwn ta an rawn ti. Kalkawng eng motor pawh kal thei tawh lo kha metal road-in a thleng tawh ti rawh u. Tin, helai aṭanga Bagha panna kawng pawh NH306(A) ah kan puang fel vek tawh a, Tuirial aṭanga Sakawrdai inkârah hmun thumah tender chhuah a ni a, kan sorkar hun tâwp lam kan tender a, vbc 13-14 dâwnin a siamna tûr kan tih chu an siam mêk a, bul an ṭan tawh a ni. Sorkar tharah erawh MP inthlan vel vângin an la ṭan thei lova, hei tunah tlêm tlêmin bul an han ṭan a, ZPM sorkar thiltih te an rawn ti leh mai mai,” a ti.
Lalchhandama Ralte chuan, “MNF sorkar hmalâkna kan thiltih vek kha vawiinah hian par a rawn chhuang dâwn a, thil reng reng hi kan hriat tûr chu- ruahmanna a awm a, a lo hlawhtlinna erawh a rei, covid khan min timuang bawk. A bul kan han ṭan a, an rawn bawkzui a nih chuan a lawmawm e. Mahse, sorkar kal tawh kha engmah ti lo intih chi a ni ngai lo, chuvângin chu’ng ang zâwnga an rawn sawi pawhin thudik chu lo hria ula, lo sawi zel rawh u,” a ti a.
“A tâwpna berah chuan thu tam tak an rawn sawi ang a, hmar tlangdung hmangaih berten an insawi ang a, MNF ram leh hnam hmangaih lo te pawh an rawn ti ang. Mahse, in hmu vek, sorkar tam tak kan hrawn tawh alawm, hmar thimpui tih ṭhin kha MNF kan sorkar khan eng kan hmu ṭan a, kan eng telh telh a, zirna lamah emaw, kawng chi kimin hmalam kan pan tawh a nih hi! Tunah kan hmasawnna ṭhuanṭhu leh mêk hian rilru a tina a ni. He SHC inthlan lo awm tûrah hian MNF chu a dawt leha sorkar leh mai tûr a ni tih hria a, lo titling ngei tûrin ka ngen a che u,” a ti bawk.
He hunah hian Sakawrdai North MNF leh HPC (R) official candidate Melody Lalchhuangzeli leh Lalhriatchhunga Hmar Sakawrdai South MNF leh HPC (R) candidate in thu an sawi ve ve bawk.