Vawiin ni 16.08.2024 Zirtawpni hian MNF chuan Mizo Hnam Run-ah Chhung inkhawm a nei a, Pu Tawnluia Ex Dy. Chief minister leh NCC MNF ni bawk chuan thusawiin, Ration Card var tana Buhfai rate tihsan chungchangah ZPM ten Thudik lo hmanga MNF an puh chu a ngaih thiam loh thu sawiin, MNF Sorkar Ministry hunlaia Buhfai tih tona order copy a awm chuan Zoram mipui hmuh ah lo pho chhuak turin a ti a ni.
Pu Tawnluia chuan “Ration Card var a buhfai leina rate tihsan hi MNF sorkar laiin, Supply Department atanga rawtna chu Cabinet-in a ngaihtuahtu tur Sub-Committee a din a, Chairman ah Dy.Chief Minister dah niin Vice Chairman-ah Supply Minister, Secretary-ah Supply Secretary, Member atan NGO aiawh te leh Consumer Affairs Committee aiawh leh sorkar official te ruat an ni. Uluk taka ngaihtuah anih hnu in Committee hian tihpun turin recommend (rawtna) a siam lova, Cabinet ah pawh report pek luh a la ni lova, Inthlan puan in a zui ta a nih kha, MNF hunlaiin Tihpun loh in vawiin ni thleng hian a kal ani tih mi zawng zawng hriat a ni. ZPM Sorkarin October 2024 atanga tih pun a tum avanga MNF min puhna hi thu belhchian dawllo a ni a. Khawiah nge MNF Sawrkarin buhfai rate tihpunna order a siam chu rawn lek chhuak rawh se. Keini chuan mipuite dinhmun zirchiang chung zelin Buhfai rate hi kan sorkar chhungin kan tipung lo a ni a ti.
Pu Tawna chuan “Phuldungsei (Zampui Tlangdung ) hi Mizoram State chhunga mi a ni a. MNF sorkarin Ration Card kan pe a, Village Council pawh kan pe a ni. Ration Card Management System (RCMS) ah Verified&Approved vek an ni a. Heng Ration Card hi ZPM sorkarin a paih (cancelled) hi hnam inpumkhatna atana pawi khawihna lian tak a ni. ZPM in Ration card an cancel hi MNF chuan kan pawm thei lo a ni. Tin, Tripura in an State-a rin luh an tum hi kan lak let leh hma chu kan bei dawn a. Zoram hmun hrang hrang a Zohnahthlak te Inzawmkhawm hi kan thupui pawimawh ber te zinga mi a ni a, keini MNF chuan ‘Pathian leh kan ram tan’ tih thupui vuan chungin Mizo Nationalism hi kan tung ding zel dawn a ni, a ti bawk.
Pu Tawnluia chuan, AMC Ward VI By Election lo awm turah hian MNF chu a mala a din loh chhan a sawifiahin, MNF Nomination committee bakah NCC leh PAC-te nen uluk taka ngaihtuah a ni a. A tul anih chuan thawhho pui neih kan titlu ta a. Congress pawhin ngaihtuahna nasa tak sengin candidate tur hial pawh an lo hual ru tawh a. Mahse Corporator boral ta, Pu John Zosangliana nupui Pi Lalrinfeli hi lusun mek a ni tih hriain an ngaihtuahnaah a lo awm ve reng a. Pu John Zosangliana nupui fanauten mittui nen hun an hman laiin; Congress pawh kan kar vang ni lovin, Pathian remruat liau liau a ni a, tiin lai leh laiah intawkin lungrual takin kan thawkho thei ta a ni, a ti. Pu Lalrinfeli tan theih tawp chhuah a, thlang tling ngei turin bial mipui te a sawm tak meuh thu a sawi bawk.
IR Batallion 4 zet din belh chu Zoram tan thil pawi berte zing ami tiin, vawiina kan Cm nita in a sawi a, kan ram kil hrang hrang atanga beihna a tawh dan leh venhimna kawnga chak zawka kan pen nan Police Modernisation Scheme hmangin IR hi Batallion 4 zet Central puihna hmangin kan din thei kha a lawmawmin, thalai sang tam tak tan eizawnna siam saktu alo ni bawk a, a lawmawm em em a ni. Venghimtu kan neih belh zarah Assam nen kan inkar buaina ah pawh kan huaisen lehzual phah thei a, a tlanchhe zawkah an tan phah a ni, a ti bawk.
Ex-Dy. CM chuan ZPM in Sawrkar kal tawh te chu eirukna leh thilchhe tinrengah min puh a, MNF chuan kan kut phuar a nih lai ngei hian kan sawrkar laia kan thil tihte chhuichian kan ngam a, min chhui rawh se, dawt thu belhchian dawllo hmanga min beihna hi thudik pholang turin an sawrkar tha chakna hmang hian ZPM chu chechhuak se la, chhuichian kan ngam tak meuh a ni, a ti bawk.
Pu Tawnluia, chuan Pathian hruaina zarah kum 80 ka tling tawh a, kan hotute hnenah, ‘kei chu ka lo upa ta, nihna pawimawh ah min telh tawh lo ula,’ tiin ka thlen a, nihna pawimawh neilo mah ila, ka ral bang dawn chhuang lova, ka theihtawp ka chhuah zel dawn, tiin, MNF tan rinawm taka a din zel tur thu a sawi bawk a ni.