Vawiin October ni 21, 2022 Zirtawpni-a MNF party Mizo Hnam Run chhung inkhawm neih hun hnihnaah MNF Adviser C.Lalrinsanga Agricultura Minister chuan thu a sawin a. “MNF hi Pathianin hnama min din ang taka Mizo Hnam khawia mi pawh kan dinchhuahna tura thawktu a ni a. Harsatna leh buaina te tawk ṭhin mah ila, a hun takah Pathianin min hruai chhuak leh mai thin a ni,” a ti.
C.Lalrinsanga chuan, MNF chu hnam tana ding, kan hruaitu hmasaten khan Pu Deng hoin Pathian hminglam chungin an din a, mihring finna mai nilo, Pathian atang finna an dawn hmang a din a ni a,
Mizo hnam hmahruaitu anih angin, ‘Pathian leh kan Ram’ tan tih thuthlunga neitute kan ni. He hnam min zawng chhuaktu Pathian hming lamtute tungding a, Pathian lam tang lote hnawl zel thin a ni a, chu chu party dangte nen kan danglamna a ni, a ti a. MNF-ah hian Mizo tawh phawt chu kan awm turah ka ngai a, an awm zel pawh ka beisei, a ti.
Agriculture minister chuan, tunhnaia Agriculture Dept.-in India ram puma lawmman a dawn Outlook Swaraj Award-a dawn theih nachhan chu kan Chief Minister zahawm tak, Pu Zoramthanga kaihhruaina hnuaia department hnathawktute leh loneitute thawhrah liau liau a ni a. He award dawng tur hian tehfung chi hrang hrang, sawm leh pakhat (11) siam a ni a. Chung tehfungah te chuan a titha ber lawmman dawng theia kan awm nachhan bul ber chu, ‘Pathian leh kan Ram tan’ thupuia nei tlat kan ni hi a ni, a ti.
MNF Adviser chuan, Congress-ah hian professional an awm tawh lo a, an hmunpui berah pawh Gandhi family an paihbo tawh a, Gandhi family huhang hi a awm tawh lo anih chuan an te tulh tulh ang, tih hi a chiang reng a, mithiamte hmuh danin, Kum 50 chhung hi an sawrkar leh a rinawm tawh lo a, ZPM nise Sub-Hqr.ah tute lam emaw chu an tling leh ta a, lam lam an nei zel a ni, a ti.
Hnam Run chhung inkhawmah MNF Diamond Jubilee Literature & Documentation-in an buatsaih, MNF dintute thlalak Mizo Hnam Run-a an tar chu Vice President Vanlalzawma’n khuhhawnna a nei a. Pu Zawma chuan, ‘MNF dintute hi mi tlawm te te mah nise kan party hian kan ngaihluin kan chhuang tak zet a ni’, a ti.
