Vawiin ni 21.02.2025 Zirtawpni chawhma dar 11 khan Mizo Hnam Run chhung inkhawm neih a ni a. Hun hnihna – political session-a thusawitu Er. Lalrinawma, Ex-Minister & GS MNF GHQ chuan party tam tak an ral tawh, MNF chu a thuthlung avangin a nung reng ang, a ti.
“Opposition kan nih tak avanga beidawnga zam mai tur kan ni lo. Kan hotu hmasaten hei leh chen min lo kaihruai tawh a, tumahin party an chhuahsan ngai lo. Keini thalaite hi politics avanga chaw nghei leh jail tang kan awm ka ring lo. Kan hotute vahvaihna leh tawrhna zawng zawngte kalkawng hi i entawn ang u.
“Tun dinhmun thlenga opposition party lian ber kan nite hi a lawmawm hle. Hun kal tawhah MNF sorkar tlak rualin MNF an ral dawn an tih kan hre fo thin. Min bansantute pawh an awm thin. Mahsela vawiin thlengin MNF chu a la ral lova, kum 65 hmel hmuin a la kal zel a nih hi.
“Kan hnampa (Pu Laldenga)-in politics-ah full stop a awm lo, a tih angin hman ata tawh – MNF vs Union, chutah MNF vs PC, MNF vs Congress a ni a. Tunah MNF vs ZPM a ni mek. Party tam tak an ral tawh a, kan founder president pawhin mual min liamsan tawh mah se kan thuthlung avangin MNF hi a nung reng ang.” a ti.
“Remna avanga malsawmna lo thlengte hi a ropui hle. Article 371G hnuaia kan chanvo ropui tak takte hi kan theihnghilh tur a ni lo” a ti.
Pu Rinawma chuan kan (MNF) sorkarah khan mipui phurrit chhawk zangkhai turin kan kal a. Buhfai supply man tlawm zawk te, MLA ten fund kan hman kim loh chhan te, healthcare atan MLA hlawh 1% kan thawhkhawmte kha a hluin tih chhunzawm leh atan a tha hle a ni,” a ti bawk.
