Vawiin October ni 30, 2023 (Thawntanni) hian MNF Office (Mizo Hnam run) chhung inkhawm neih a ni a. Hun hnihnaah Dr. Rinzuali d/o Laldenga, Adviser, MNF Gen. Hqrs ni bawk chuan thu sawiin, “Mizo hnam tan MNF lo chu dinchhuahna dang a awmlo. MNF hi kan danglam bik a, India nena inremna thuthlung thami ziaktute kan ni. Thisen leh tawrhna hmanga dinchhuah kan ni a. MNF tluka tuar leh Zoram champion puitur dang an awmlo. Mi thenkhat ten kan history haiderin, nuaibo tum hial mah se, tun dinhmun kan thlen theihna atana tuartute leh nunna hlan tute inpekna kha theihnghilh rual anilo e,” a ti.
MNF Adviser chuan, Peace accord hi a tha lutuk a, mi mak tih hial a ni. Hei hi kan zirchian thar leh a, nasa lehzuala kan thehdarh pawh a tul a ni. Peace accord ziak tura India leh MNF an inbiak lai khan ka pa (Laldenga) bulah ka awm ve a. Inremna a duhtui em avangin lungawilo taka rawn haw chang an nei fo a ni. A tawpah chuan inremna tha tak an duangchhuak thei ta a ni.
Mi thenkhat ten kalphung thar an tih hi, a sawitute ngei pawhin an sawifiah thiamlo a. Thalaite pawhin kalphung thar an sawi hi an hrethiamlo a. Incheina chikhat emaw an timai niin a lang. Campaign danphung kan thlak a tul chang a awm ve bawk thin a. Kan tu leh fate kan enkawl that lehzual pawh a tul ang. MNF chuan Pu Zoramthanga lo chu Chief Minister atan duh dang kan neilo, a ti bawk.
He hunah hian Pu PC Laldinthara, Gen. Secy. MNF Gen. Hqrs hnen atangin, Covid hripui len laia Mizoram sorkarin Central atanga kan sum hmuhtur kan hmuhloh chungchanga, thu belhchian dawllo ZPM ten an thehdarh chungchang sawifiahin thutawi a sawi a. Aizawl City Block hrang hrang atangin, report tawi ngaihthlak a ni bawk.
