Vawiin ni 25.09.2023 Thawhtanni khan MNF Adviser & District Council & Minority Affairs Minister Robert Romawia Royte chuan Siaha Bazarah Siaha District MNF street campaign buatsaihah thu a sawi a, kum tawp MLA election-ah hneh takin MNF a chak dawn, a ti.
Robert Romawia Royte chuan Mizorama MLA bial 40-ha MNF boruak san chakzia thlirin MNF-in hneh taka chakna a chan a rin thu a sawi a. “District Council pathuma MLA Seat panga (5) pawh MNF-in kan lak vek theih nan tan kan la chho mek a, ADC area-a mipuiten ruling party MLA an duh a, ADC area bial 5 hi MNF-in kan chak vek a rinawm,” tiin mipuite chu MNF vote vek turin a sawm.
Pu Robert-a chuan New Siaha MDC Bye Election (29.09.2023-a neih tur) pawh Pathian leh New Siaha mipui zarah chak ngei kan beisei tih sawiin, “Mizorama ruling sorkar be eih thei leh Mizoram sorkar hmasawnna hnathawh dodal lo tur ngei New Siaha mipuiin MDC atan in mamawh,” a ti a. Thalaite mamawh leh hmasawnna hnathawk thei tur MNF Official candidate Pu Nelson Khenglawt chu vote tling ngei turin mipui a ngen bawk.
DCMA Minister chuan ADC-te chu duhsak takin Mizoram sorkarin sum a pe thin tih a sawi a. “Sum kan pek dan ni lo, dan kalha sum hmang an awm chuan dan an hmachhawn zel a ngai dawn,” a ti a. MADC-in dan kalhin posts awm lovah mi tam tak election campaign nan appointment a pe nia report awm pawh chhuichian a ni ang a, thil tidik lo an awm chuan action lak a ni ang a ti.
“Kan Annual Plan hnuaia Centralin sum min rawn pek tur chiang sa Rs. vbc 2600 chuang Covid hripui vangin min rawn pe lova, covid tanpui nana min pek pawh Rs vbc. 70 chuang awrh chauh a ni. Heti chunga Pathianin mal a sawm mek kan Chief Minister Pu Zoramthanga sum enkawl thiam vanga riltam leh chhuanchham tumah awm lova hun harsa kan sutlang thei hi a ropuia mipuiin lawm nachang an hria,” a ti.
“Covid hripui a leng chungin Mizoram dung leh vangah hmasawnna hnathawh a tam em em a, GST atanga sorkar sum hmuh pawh Congress hunlaia an hmuh tam ber letin a pung ta. Hei hi hmasawnna hnathawh tamzia tichiangtu a ni.”
“Heti khawpa hmasawnna hna Sorkarin a thawk nasa chunga India ram state zinga *leiba nei tlem ber dawttu (pahnihna)* kan ni hi a lawmawm tak zet a ni. Congress hun lai khan Mizoram sorkara thleng ngai lo _sum lapse pui (mega lapse)_ tum hnih a thleng a, kan hnamin a tuar nasa hle,” Pu Robert-a chuan a ti bawk.
Street Campaign-ah hian MNF zawm thar Voters 377 lawmluh an ni a. Program hi Siaha MNF Vice President Pu S. Lalvuana’n a kaihhruai a. New Siaha MDC by-election MNF Candidate Pu Nelson Khenglawt leh Siaha MLA biala MNF Candidate tur Pu HC Lalmalsawma Zasai ten thu an sawi bawk a ni.
MNF Adviser Robert Romawia Royte hian September 23, 2023 Zirtawpni khan New Siaha Vety Kawn public meeting-ah thu a sawi tawh bawk a ni.
