Kum 1971-a Chhamb indonaa tel Mizo sipai intélkhawm, Ex-Fighting Fifth Association member-te leh an chhungte mi 53 chu March 23-25, 2023 chhunga Kalimpong, West Bengal-a Chhamb Battle Honour Day vawi 50-na leh 5th Assam Regiment kum 60 tlin lawmna hmang turin vawiin March 21, 2023, Thawhlehni zing khan Aizawl atangin an chhuak a, MJA General Headquarters President C Lalrambuatsaiha’n a vailiam.
Chhamb Battle Honour Day golden jubilee lawmnaa tel turte vailiamna inkhawm tawi hi vawiin zing dar 8:45 khan Vanapa Hall kawtah neih a ni a; vailiamtu C Lalrambuatsaiha chuan, India sipaiah Mizo tam tak an lut tawh tih sawiin, “Mizo sipaite hi an chhuanawm em em thin a, indona hmunah pawh rál hmatáwngahte awmin, huaisen takin ram tan an lo bei tawh thin a, Mizote min tihmingthatute an ni,” a ti a, tluang tak leh hlim taka kal turin duhsakna a hlan a ni.
Ex-Fighting Fifth Association (EFFA) member-te hi East Pakistan (tuna Bangladesh)-in zalenna a sual lai, December 3-17, 1971 chhunga Chhamb Sector, Jammu & Kashmir-a India leh Pakistan indonaa telte an ni a, he indonaah hian India chuan Pakistan a hneh a ni. Indonaa tel 5th Assam Regiment-te chu India sorkar chuan battle honour pein, 1971 indonaa battle honour a pek awm chhun an ni.
Kum 1971-a East Pakistan-in zalenna a sualnaah India-in East Pakistan lamah Pakistan a do a, chu chuan Jammu & Kashmir lama Chhamb Sector lam pawh kâng kaiin, Chhamb Sector-ah hian December 3, 1971-ah India leh Pakistan chu an indo tan a ni. Chu indonaah chuan 191 Infantry Brigade hnuaia awm 5th Assam Regiment sipaite pawhin nasa takin Pakistan an do a, a hnuah India chuan Pakistan a hneh ta a ni.
EFFA hruaitute sawi danin, Chhamb indonaah hian Mizo sipai 180 chuang an tel a, Mizo sipai zingah hliam eng emaw zat awm mah se, thi an awm lo a ni.
Kalimpong-a Chhamb Battle Honour Day lawmnaa tel tur sipai bángte leh an chhungte mi 53 vailiamnaah hian MJA President hi MJA Gen. Hqrs Vice President Lalremsiama, Treasurer C Lalhmachhuana leh Secretary pahnih Lalnunzira Chawngthu leh K Zothanpara ten an tawiawm a ni.
