Mizoram Journalists’ Association (MJA) General Headquarters chuan vawiin 20.12.2023 khan hmun pahnihah MJA Charity Fund an hlan.
MJA Gen.Hqrs hian Krismas dawn apiangin Charity Fund a khawn thin a, mi harsate tanpuina turin MJA member-te’n sum an thawh khawm thin a. Kuminah pawh MJA member thahnem takin pawisa an thawh khawm a, sum thawhtu zingah MJA member ni lo tlem a zawng an awm bawk.
Charity Fund-a hmuh sumte chu vawiin khan hlan a ni a; Manipur-a Zo hnahthlakte tanpuina atan Rs 26,500 leh Civil Hospital, Aizawl Charity Fund-ah Rs 50,000 an pe a, MJA aiawhin president C Lalrambuatsaiha’n a hlan a ni.
MJA Gen. Hqrs. hian tukin zing karah khan Aizawla MJA member kum lama upa mi pakua hnenah Krismas thilpek an hlan bawk.
MJA President C Lalrambuatsaiha chuan, “Civil Hospital hi Mizoram mipui náwlpui, hmun hrang hranga awmte’n an pan khawm a ni a, khawsak harsa zawkte’n an pan khawm ber a ni. He damdawi-in pantute zingah hian mi rethei tak tak an awm thin a, chung mite chu damdawi-ina thawkte’n damdawi leinate an tumsak thin tih kan hria a, chu’ng mi harsate tanpuina atan chuan tangkai leh daihzai taka hman atan kan neih ang tâwk kan rawn thawh ve a ni,” a ti.
Dr Zoramthanga, Med. Supdt. pawhin thusawiin,
“MJA-te’n kan damdawi-in in rawn hre thin hi kan lawm a, Charity Fund in rawn pek hi damlo harsate tan tangkai taka hman a ni ang. MJA nen kan thawhhona a tha a, MJA-in min duhsakna zawng zawngah kan lawm tak zet a ni. Mi thenkhatin Krismas puala damdawi-ina awm mi harsa zawkte an tanpui thin hi a hlu a, a lawmawm a, mahse, Krismas vuakvetah chauh lo pawh damlo rethei tak tak an awm ve reng tho avangin Poor Fund-a dah hi a hlu lehzual a ni. Tunah hian thisen vár kan tlachham deuh reng a, thisen pek lamah Mizo thalaite kan tan mar zel a ngai. Thisen var hi ni 5 chauh a dam a, chuvangin, blood donation camp-ah hian tum khata thisen pek teuh teuh aiin, pek zin a pawimawh zawk a ni,” a ti.
