Vawiin, May 31, 2023 hian Lal Thanhawla Auditorium-ah Aizawl District Congress Committee (ADCC) huamchhung Block Leaders’ Conference neih a ni a, he hun hi Lal Thanzara Vice President, MPCC in kaihruaiin, Dr. Lalmalsawma Nghaka Treasurer MPCC in hunserh a hmang. RL Valla, Vice Chairman, MPCC Campaign Committee chuan inlawmna thu a sawi a. MPCC President Lalsawta hnen atangin thusawi ngaihthlak a ni a, MPCC Manifesto Drafting Committee Vice Chairman Ronald Sapa Tlau, Ex-MP hnen atangin Congress Party Manifesto sawifiahna ngaithlak a ni bawk.
He hun a thusawitu, Lalsawta, President MPCC chuan ‘Keini hi Kum 2018 kan tlak hnu aṭang khan han lawm viauna tur chhan kan nei lo chungin, sorkar ta ila sorkar tha kan din dawn tih kan hriat avangin nghet takin Congress tan kan ding a ni. Rinawm taka kan din ngheh tlat avangin mi ṭha tak tak Congress-ah an lo lut tawh a, mi ṭha tak tak ten min rawn la belh zel dawn a ni. Heng mi ropui leh hmingtha tak tak lo lut tawh leh lo lut mek te hian rawn luh duh chhan an nei a; chu chu kan Party Policy-ah hian mipui an lal ber thin a, tun ṭumah pawh hian an lal ber dawn nia an hriat avang niin kan hria a ni. Heng mi huaisen te zarah leh keini a chhunga mi huaisen te zarah hian Mizoramah sorkar tha kan siam leh na tur kawl a eng niin ka hria a, huaisen taka theihtawp kan chhuah chuan kan sorkar ngei dawn a ni, a ti.
MPCC President Lalsawta chuan, “Arpuiin a note a hruai lai hian a note te hi lak hran han tum ngawt ila, a laksak tumtu kha a hneh dawn leh dawn loh a ngaihtuah lo a, a bei mai thin, chutiang chuan keini aia dinhmun ṭha lo ve leh chhawng te tan hna kan thawk dawn a, humhim a dinchhuah tir hi kan tum a ni. Chuvang chuan Congress Party chuan inthlan a pawisa chakna tih bo hi kan tum tlat a, kan tum chhan chu keini aia rethei leh zual zawk te tan a thawk tur kan nih avang a ni. Ram siam that kan duh tak tak chuan he thil hi kan tih ngei angai a, kan hotute pawhin candidate te ti hautak lo zawng a ruahmanna kan siam a tul tak zet a ni” a ti bawk.
Lalsawta chuan, “Politics a kan awm chhan hi thil tha tih a ni a, kan thil tha tih tam tak zingah Dr. Lal Thanhawla ho a kan din Falkawn Referral Hospital leh Tuirial Hydel Project ringawt pawh hi ropui tak a ni. Congress Party hian thil tha tam tak kan ti tawh thin a, kan thil tha tih te hi kan sawi uar ve pawh a ṭul hle a ni. Chung zawng zawng chu Congress Party in lo thlan tlin thin tawh vang a ni a, in zar liau liau a ni” a ti.
He hunah hian Dr. Lallianchhunga Chairman, MPCC Media Deptt in power point presentation hmangin Congress Party Manifesto No.1 ‘Tang Puihna’ sawifiahna neiin, kalkhawmte en turin ‘Tang Puihna’ Video tawi tlangzarhna a awm bawk. Chawhnu lamah Block tin report ngaihthlak niin, manifesto chungchang zawhna leh chhanna hun hman a ni a. He hunah hian Pi Lalenkawli Pautu leh Nl. Sangkimi Khiangte ten kalkhawmte zaiin an awi bawk a ni.
