Mizoram Tourism Department-in khawvelah a ruala guitar perh tam ber world record siam tum

Mizoram Tourism Department buatsaihin vawiin khan World Tourism Day 2022 chu Vanapa Hall, Aizawl-ah hman a ni a. He hunah hian Tourism Minister Robert Romawia Royte chu Khuallian a ni.
Tourism Minister chuan International Tourism Mart neih chhungin Nov. ni 18-ah khawvelah a ruala guitar perh tam ber kalkhawmna hun hman tum niin, hemi hmang hian Mizorma chu Guiness Book of World Records-ah pawh ziah luh beisei a ni a ti a. Nov. ni 14 & 15-a Reiek-a neih tur ‘Anthurium Festival 2022’ chhim turin mi zawng zawng a sawm nghal bawk a ni.
Tourism Minister chuan November ni 16-18, 2022 chhunga Mizoram-in International Tourism Mart a thlen tur khuh hawnna neiin, ramchhung state dangten an la nei miah loh ‘ Responsible Tourism Policy’ chu Mizoram-in a hmang tan tawh a, khawvel hriat tur khawpa nasain tunah hian Mizoram Tourism hmasawn zelna turin chak taka hmalak zel a nih thu a sawi a.
World Tourism Day hi khawvel pumah UNWTO ruahmannain thupui thlan bik neiin kum 1980 atang khan hman tan a ni a. Kumin hi a tum 42-na niin, kumin atana thupui chu ‘Re-thinking Tourism’ tih a ni.