Lai Autonomous District Council Thlasik thutkhawm Ni thum awh tur chu vawiin khan LADC Session Hall, Lawngtlai ah an Chairman Pu V.L Hmuaka kaihhruaina hnuai ah tan a ni.
Session hun hmasa lam chu MDC lo ni tawh kumin July Ni 2 a chatuan ram pan ta Pu Thanglawma sun nan hman niin, Chief Executive Member Pu C.Lalmuanthanga leh Bungtlang South bialtu MDC Pu L.Lalhmachhuana ten Pu Thanglawma ten uina thu sawiin Minute khat chhung amah sun nan Member te ngawi rengin an ding a ni.
Hemi hnu hian zawhna leh chhanna hun hman niin, ZPM Member Eptu lam hruaitu Pu K.Hre Kung zawhna chhangin CEM, Pu C.Lalmuanthanga chuan Mizoram Sorkar angin LADC huamchhungah Aikal lak khapna a hranpain kalpui a ni lova, Aikal lak hi phal loh sa a ni a ti a, CEM chuan loh theihloh vangin thuneitute hriatpuina in Aikal la an awm tih erawh Sorkarin a hriatthu a sawi.
LADC Thlasik thutkhawm Ni thum awh turah hian vawiin chawhnu lam ah Sorkar bill pahnih, The Lai Autonomous District Council (Salaries, Allowances & Pension of Member) (Fourth Amendment) Bill, 2024 leh CAG Report for the year, 2016-2017, 2017-2018, 2018-2019 te House ah pharh ani a, Bill hi naktuk atangin House ah sawiho a ni anga, Session tawpni ah pawm tum a ni.
LADC Thlasik thutkhawm ah hian House a chhan tur zawhna 31 lutin Sorkar bill pahnih putluh a ni a, Private Member Resolution pakhat a lut bawk.
