September 25, 2023 (Thawhtan) hian Champhai South bial chhung Melbuk leh Zokhawthar Venghnuaiah Congress Unit huaihawtin Street Campaign buatsaih a ni a. He hunah hian Champhai South bial a Indian National Congress (INC) atanga ding tur Dr. Lallianchhunga, MPCC Spokesperson leh Gen.Secy ni bawk chuan thu a sawi.
He hunah hian Dr.Lallianchhunga chuan thusawiin, “Champhai leh a chhehvel hi khawchhak ram te nena kan insumdawn tawnna kawtchhuak atan Sorkar laipuiin a buatsaih mek a. Inkalpawhna kawngpui National Highway-6 pawh Sorkar laipui hmalaknain buatsaih mup mup mek a ni a. He insumdawn tawnna lian tham tak lo thleng tur hi kan pumpelh dawn lova, a hlawkna tel tur zawnga kan inbuatsaih hi kan tih ngei ngei tur zawk a ni a. Hnamdangte insumdawn tawnna a alo thlirtu ringawt kan ni bik tur a ni lo. Sumdawnna kawngah hnamdangte’n min chimral loh nan sumdawn dan pawh kan inzir chawp zel a pawimawh hle a. Mizo thluak hi hnamdangte thluak aiin a nep bik lo a ni” a ti.
MPCC Spokesperson Dr.Lallianchhunga chuan, “Nakum Lok Sabha inthlanpuiah Congress party kaihhruai I.N.D.I.A. chu Central BJP paihthla turin a inbuatsaih mek a. Mipui ngaihdan lakna zawng zawng deuh thaw-ah Congress party kaihhruai INDIA chu chak tura rinkai a ni zel tawh a. Central-ah Congress kaihhruai INDIA in sorkarna a siam chuan khawchhak nena insumdawn tawnna dinhmun pawh a that leh ngei a beiseiawm. Khawchhak nena insumdawn tawnna hi a hringtu chu Congress sorkar a ni a, a hringtu ngeiin chhungkaw sang tam tak te harsatna hi a chingfel mai ang ” a ti.
Dr.Lallianchhunga chuan, “Kohhran mipuiten India ramah Lal Isua Chanchintha puandarhna atan theihtawpin kan sum neih remchan ang te kan thawh thin a. Mahse, Central BJP sorkar hnuaiah kan Missionary ten nekchepna leh dodalna an tawk nasa tulh tulh a ni. India ram hi sakhaw hrang hrang te zalenna ram a nih leh theihna turin Mizo mipuiten Congress party kan thlawp tlat angai a. Mizorama kan zalenna ringawt hi a tawk lova, India ram State dangah pawh Kristiante hi kan zalen tur a ni ” a ti.
Melbuk Kawn leh Zokhawthar Venghnuaia Street Campaign hi Melbuk Congress Unit President K.Khawtinthanga leh Zokhawthar Congress Unit President F.Zaithanpuia ten an kaihruai a, Champhai South Block Congress Committee President V.Rosangzuala’n Candidate chanchin sawina hun a nei bawk.
Dr.Lallianchhunga hian Melbuk Health Clinic, Community Hall leh Field te a tlawh nghal a ni.
