Mizo thalaite All India service luttam tura beih nasat a tul – Education Minister

Mizoram Samagra Shiksha leh Central YMA te chuan vawiin khan School Education Minister Office Chamber-ah thawhhona thuthlung an ziak a, School Education Minister Lalchhandama Ralte-in a hriatpui.
Lalchhandama Ralte chuan he thuthlung ziahnaah hian thusawiin Kum 2007 atanga Samagra Shiksha leh Central YMA-in zirna kawngah thawhhona an nei chho zel chu lawmawm a tih thu a sawi a. Minister chuan YMA kumpuan ram leh hnam humhalhah a point pawimawhah zirna uar tih telh a ni chu lawmawm a tih thu a sawi. Minister chuan zirna lamah kan san loh chuan ram leh hnam humhalh pawhin awmzia a nei thei lo a ti a. All India service-a lut kan chatlak ta viau a, hei hi sorkar pawhin a vei a, thalai an tlin theih nan theih tawp a chhuah mek a, MYC-in kum kalta atangin theih tawp a chhuah a, beisei angin a hlawhtlinna hmu rih lo mah ila, tha thlah lova beih chhunzawm zel a ni a, Super IAS 20 chu 40-ah hlang chhovin coaching centre tha zawkah thawnchhuah tumin ruahman a ni a ti. Ram leh hnam humhalhnaah hian kan ram leh hnam hnuk khawihtu chher kawngah thahnemngai takin sorkarin a thawk a, engtikah emaw chuan a rah hmuh a tur a awm ang tih a beisei thu a sawi.
Minister chuan hmun tina sikul hmun hma te pawl, mimal leh thiltitheiten neih tumin an nek thin tih sawiin, hengte hi humhalh pui turin leh zirna hi kan ta a ni tih zirtirna kalpui turin YMA te a sawm a ni.
Central YMA President R.Lalngheta CYMA President chuan Samagra nena YMA thawhhona chu a hun chhung a rei tawh a, thawhhona neih puiah thawhhona a thatna berna a nih thu a sawi a. YMA-in zirna a ngaih pawimawh thu leh nikum lamah phei chuan kum puanah hman a nih dan te, tunah pawh zirna ngai pawimawh tur leh All India service Mizote kan tlin theih nan thalaite an fuih thin thu a sawi bawk.
Samagra Shiksha leh Central YMA thawhhona thuthlungah hian YMA-in sikul kai rual kai lo dap chhuaha sikul kai tura fuih te, naupang rualbanlote laka rilru puthmang dik lo siamthat te, YMA Group, Sub. Hqrs leh General Conference-ah zirna chungchang inhrilh hriat te, zirlaiten ngaihsan tur dik an ngaihsan a, hnualsuat tur dik an hnualsuat theih nana thawhho te, Branch YMA-in hnam zia rang pawimawh an huam chhung zirlai naupangte zirtir thin te a tel a, thawhhona thuthlung hian March 31, 2024 thleng a huam dawn a ni.
Thawhhona thuthlung ziahnaah hian School Education Secretary Dr Lalzirmawia Chhangte leh School Education Director Dr H.Lalthlangliana te, Samagra Shiksha Officer te leh Central YMA hruaitute an tel a ni.